喪"師": 13-有人犠牲，係意料中事

「跑呀！」我大叫。我都即刻跑過去，抱起兩個跑最後嘅細路，左手抱起一個，右手抱起一個，就衝。始終我係大人，我抱起兩個細路都跑得比其他人快，我先到車到。放底手上個兩件，再坐上車，準備好開動架車，等埋其他學生上車就可以即刻開車。我望住啲學生陸續上車，但有一個學生（輝輝）係3米外跌倒，另外一個學生（小仁）就走去扶佢，但啲喪屍好快就殺到佢地個到，咬死咗佢地兩個，車上面嘅學生見到都係到喊！
最遲入嚟個個呆咗，唔識關門。
「關門，關門，關門，關門呀！」我叫佢地。
佢地一關門之後，我就即刻開車。
雖然犠牲咗兩個學生，但我表現好冷靜，因為呢次逃亡會有人犠牲係意料中事，大部份學生都上到車，已經非常幸運。
至少，今次，唔算我親手殺佢地。
一定唔算，佢地只係唔好彩。
我又有咩辦法！而好在呢到嘅交通平日都順暢，所以冇咩車停咗係路上，冇咩阻擋，我好順利咁駛咗架車上獅子山山腰。雖然斷斷續續都有啲喪屍追住我地架車，但我都好快就撇甩咗佢地。到咗山腰，我望咗望周圍都冇人，因為喪屍爆發嘅時候係平日，冇咩人行山，所以山上應該都唔會太多喪屍。我打算帶佢地行上去我之前見過有人耕作嘅地方，旁邊又有泉水。我地係個到安頓就唔使擔心食嘅問題。
落車前我又要同佢地講下指示，廢時佢地走嚟走去。「陣間我帶大家去搵個地方安頓，你地跟住我唔好走散，知唔知？」
「你幾個行最後，一面行要一面睇住後面有冇喪屍。」




「全部人都要留意周圍有冇喪屍，見到有就即刻分散走，我保護唔到你地咁多個㗎！」講完指示之後，我地就一齊落咗車，我一面行面一眼關七，沿路執到啲人地丟底嘅柺杖，我自己拎咗枝傍身，之後執到個啲我就分咗比啲細路用。
我地行過嘅地方，有啲係旁邊斜落去嘅，有時都見到有啲喪屍係下面。不過因為佢地肢體唔協調，所以爬極都爬唔到上嚟。見到我地行過之後想衝上嚟，上咗小小斜之後又跌低。
「行快啲！唔好望啦！快啲行！」
就算見啲喪屍行唔到上嚟，我都叫啲學生快啲行，避開佢地，始終都唔想有咩意外發生。然後我地行到一個好多轉彎位嘅地方，我係一個轉彎位，我一眼就撞上係個個位徘徊嘅一隻喪屍，臨離我只有1米，我嚇到即刻就咁退。但因為我叫班學生跟貼我，佢地就真係跟得好貼，我個下退後就撞到佢地。而個時佢地仲係個轉彎位後面，咩都睇唔到，唔知發生咩事。我都未嚟得切出聲叫佢地跑，隻喪就已衝到我面前，我將手中嘅柺杖打橫，頂住佢條頸，等佢咬唔到我。班學生見到之後紛紛尖叫住咁向後跑。我大力咁用柺杖將隻喪屍向後推，喪屍不穩向後跌退兩步。趁呢千鈞一髮之際，我雙手捉住柺杖嘅一端，大大力咁用柺杖揮打喪屍嘅頭。打咗一下，冇事，第二下，跌後咗小小，第三下，枝柺杖斷咗。我呆咗一秒之後，即刻丟低手上半枝斷柺杖，但我都未向後跑，就俾喪屍撲到。我係地下用手推住喪喪嘅搏頭，想拉開我地嘅距離，但我已經開始唔夠力啦，覺得自己只係係到垂死掙扎。就算我知道班學生冇用，佢地已經匿遠咗，佢地救唔到我，亦都唔敢救我。
但我依然抱住一絲希望大叫：「幫下我！」「呯！」我見到上面有枝柺杖一下打落喪屍嘅後腦，佢個下令喪屍塊面更貼近我塊面。呢個時候我心諗，條友係咪豬隊友呢㗎！但喪屍壓住我嘅力亦因此稍為弱咗啲。我即刻大力推開一啲距離，終於有位俾我一腳撐遠隻喪屍。喪屍向後跌咗落地，連幫我嘅學生個樣都未睇清，我就一手拎走佢手上嘅柺杖插落倒地嘅喪屍嘅頭到。
一下穿頭！就連我自己都估唔到原來我可以咁大力嘅！
見到隻喪屍終於一動不動，我先敢移開視線。
望向旁邊，原來啱啱幫我嘅係小千。
佢受驚咁望住隻喪屍。
令我諗起曾經聽人講嘅一句話「勇敢唔係唔驚，而係驚都願意迎難而上」。




最重要嘅係我係佢地面前已經冇老師嘅形象可言，佢咁都願意救我。我感激又難過咁摸摸佢個頭。

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/