喪"師": 10-唔可以睇小啲小朋友

我繼續諗點樣將條車匙勾返上嚟，我將一條繩同一個拆成一個勾咁嘅萬字夾綁埋一齊，然後就去返校長室上面放個勾落去，嘗試勾住個車匙。但我足足係上面試咗一個鐘都勾唔到條車匙，集中精神咁耐，我除咗好攰亦好灰心。於是我爬返返去休息下先。小森同家偉見我愁眉不展，走過嚟問我：「Miss，你啱啱個幾次去咗邊呀？點解你好似好苦惱咁。」
我如實同佢地講我打算帶住大家逃走，但係拎唔到車匙，始終佢地遲早都會知。過咗一陣，家偉同我講：「可唔可以用膠紙呀！」
我聽到之後如夢初醒，係喎，我都冇諗到添。所以真係唔可以睇小啲小朋友。之後我係繩嘅未端貼咗好多膠紙，終於順利咁將個車匙痴上嚟。之後我要諗嘅就係我地點樣可以安全咁上到車，距離糧食耗盡仲有10日，我要係10日內諗到辦法。
但就係第二日我發現我地啲糧食小咗好多，剩返只夠7日。點解小咗咁多，我估係因為有細路偷食，而我一定要捉佢出嚟，如果唔係糧食不如我預期咁消耗，我地嘅時間就會更緊迫。我唔係話要捉個個人（班人）出嚟鬧，我都明白啲細路好易就忍唔住，但我點都要顧全大局搵個人出嚟好好教育一下，等佢唔好再咁做。
於是，我叫班學生圍埋，直接了當咁同佢地講，我地嘅糧食小咗好多，知唔知係邊個偷食。佢地都唔出聲，我有啲驚訝，佢地細細個就咁有義氣，又或者佢地全部都有偷食，於是我講：「好！冇人認唔緊要，以前嘅事我既往不咎，但希望以後唔好再發生，因為我對糧食嘅分配係以我地嘅最大利益為目標。都係為咗大家好，如果再發生啲咁嘅事，俾我知道係邊個的話，後果自負！」點知到咗第二日，糧食又小咗，只剩5日份量。我好嬲，尋日講過一次都唔聽，仲偷食。於是我再聚集班學生，問佢地，但依然冇人答。我已經冇咩耐性，我唔信全部人都唔知道係邊個做嘅，始終呢個班房一眼望曬。「如果10秒之後再搵唔到係邊個嘅，我就逐個丟你地出去！」我嘅眼神變得兇狠。
10、9、8、7、6、5、4
「Miss Miss ⋯⋯」
好幾個學生都叫停咗我。
「係邊個？3、2 ⋯⋯」「係明仔呀！我地都冇食架！」
「係呀！係呀！」好多同學都附和。




我行去明仔面前，講：「係咪你做嘅？」
「係呀！點呀！」佢仲理直氣壯。
「我尋日已經講過一次，你點解仲要咁做？」
明仔得得戚戚咁講：「餓囉！」
「呢個係我定落嚟嘅規矩，其他同學都餓㗎啦！你冇特權，你都要跟規矩，如果唔係你會影響我地所有人。」
「我係中意呀！吹咩！」
我真係聽到眼火爆，敬酒唔飲飲罰酒：「好，因為你食咗我地嘅糧食，所以由依家開始你分小啲嘢食，直到你填補返你偷食嘅分量先。」
明仔聽完之後憤恨咁睥住我，做錯嘢仲咁串嘴，真係想大巴大巴車落去。但正當我唔為意嘅時候，佢一掌拍咗落我塊面到。6歲嘅細路手勁都唔細，但佢打嘅唔止係我塊面，亦都係我嘅尊嚴。之後，我諗都冇諗，大大力摑返佢一巴。然後叫佢道歉！

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/