喪"師": 9-我係想幫我地解脫

我反應好快咁埋匿埋咗喺枱底，屏息靜待。我聽到喪屍慢慢行入嚟，佢撞到盡頭嘅牆之後，又行返轉頭去門個到。撞到到門關埋咗，之後又來來回回咁行咗幾轉。我佢已經行唔返出去，因為諗道門已經俾佢撞到關埋咗。我只能趁佢行到門口嘅時候即刻爬返上去逃走。雖然我係咁諗，但隻喪屍來來回回咁行咗幾十次我都冇行動到，因為我實在唔敢。好怕自己爬得唔夠快，會俾喪屍咬死。過咗差唔多一個鐘之後，我諗到我班學生。心諗佢地依家會唔會好擔心，我死咗之後佢地都唔知點算，早知我就睇定啲先，唔好落嚟住啦，我依家真係好後悔！又過咗一陣，我都係決定放手一搏，我調整一下自己嘅姿勢，諗住當隻喪屍就行到門口位置，距離我最遠嘅時候，我就即刻企返上枱，爬返上通風口。
就係依家啦！我企返上枱嘅時候，隻喪屍啱啱轉身亦望到我，然後衝埋我到。我雙手捉住上面，一拉，拉自己上去。拉咗自己個身上去之後，我下半身仲喺下面，我feel到喪屍隻手掂到我，我即刻向前爬，差啲鞋都俾佢捉啲埋。不過好在最後我都順利脫險。然後，我聽到下面擾攘咗一陣就靜咗落嚟，我望落去，見到喪屍又回覆漫無目的咁行嚟行去。我再望望啱啱打開嘅櫃筒，個車匙就喺個到。我好懊惱，啱啱我差小小就可以攞到車匙啦！我唯有先返去，擇日再戰。
返到去之後，我抖咗抖，然後又喺到搜集物資，睇下可唔可以係上面將條車匙勾上嚟！我喺到搜每個小朋友嘅書包，將佢地書包入面啲嘢拎曬出嚟分類放好，睇下有冇咩有用嘅嘢。
書同功課放埋一邊，紙巾、文具、錢又放埋一邊。仲見到有小朋友嘅書包入面有錄音筆，不過過咗咁多日，晨早冇電。但我個心隱隱有啲不安，唔知枝筆有冇錄到我之前推啲學生去死嘅情況。於是我拎入面嘅記憶卡出嚟，將佢折斷，同割花上面嘅晶片。個時嘅我又點會知道，就算冇呢個錄音，呢班由我救出嘅學生都會將我推入絕境。之後我係一個小朋友嘅書包搵到一本簿，呢本簿明顯唔喺學校嘅功課。我打開嚟睇，係英文嚟嘅，字體都好整齊。係一個學生（蔡家偉）書包入面搜到一本英簿一啲都唔出奇，出奇嘅喺入面嘅內容。入面有佢一家人嘅日常作息時間，同埋寫咗好多種殺人嘅方法，例如燒炭、用刀。而每個方法都有根據佢所記錄屋企人嘅日常作息時間作調整，仲係下面寫咗可行性嘅分析。
我好疑惑，蔡家偉想殺咗佢啲屋企人，點解？我亦相信因為佢嘅計劃內容係用英文寫嘅，所以佢屋企人先冇發現。我訝異於只有六歲嘅佢嘅英文能力，亦佩服佢寫出如此詳細嘅計劃。可惜呢啲計劃，係我呢個大人眼中都係太幼稚。以佢一己之力根本冇可能做到。但我係到諗，以佢咁嘅智力，咁嘅心態，大個咗分分變咗殺人狂，又或者即將變成。佢見到我睇緊佢本嘢，亦都眼甘甘咁望住我。我招手叫佢過嚟我身邊，問：「家偉，我睇咗你本簿，請你解釋一下係咩事？」
佢沉默不語。
但我依家就要知道原因，因為我唔想放一個計時炸彈係我地班，佢好可能係我地之中嘅一個隱患，我點知佢有冇諗過要將我地都殺埋。
於是我假意要脅佢：「你想我地逃出去之後，我俾你屋企人同埋其他人知道你寫嘅嘢？」
佢低頭講：「我只喺寫下，我唔會做！」
「咁你點解咁寫！佢地喺咪做咗啲咩事傷害咗你？」




佢靜咗一陣，講：「佢地只係互相傷害！」
「佢地係指你父母？」
家偉點頭。
「佢地係咪成一噪交，所以你想解決佢地去消除你嘅痛苦？」
佢深深咁嘆咗一氣講：「唔係，現實係佢地痛苦嘅根源，佢地係我嘅痛苦嘅根源，所以我係想幫佢地解脫，亦係幫我地解脫。」
我聽完後無言，因為我覺得佢講得又有啲道理。
「放心！我唔會講出去，我希望你明白你咁做只係逃避，你嘅人生咁會就毀咗，根本唔值得。」
但佢竟然好堅定咁答我：「我不了了之先係逃避，我理想嘅生活就係冇咗佢地嘅生活。只要佢地係呢個世界上消失，就可以做到啦！（苦笑）不過佢地依家都好可能已經死咗！」我唔認同佢咁嘅想法，亦可能係因為我根本唔明白佢。
咁令我諗起我睇過一句說話—呢個世界並唔係跟住道德嚟運行。
並唔係父慈就一定子孝，兄友就一定弟恭。




如果我地只用狹窄嘅道德觀去睇呢個世界，實在遠遠唔足夠。對於呢件事我冇再追問，只任由其係我心入面腐爛敗盡。

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/