喪"師": 11-係咪想一齊死呀！一齊死囉！

我諗都冇諗，大大力摑返佢一巴。
「道歉！」我兇狠咁望住明仔。對於眼前呢個細路，我已經徹底失去耐性，每次同佢講道理都冇用，仲敢同我郁手。真係唔俾啲顏色佢睇都唔得。
但佢都好倔強，睥住我講：「我一定會同媽咪講，等佢投訴你，等你冇咗份工！」
我聽到真係眼火爆，佢以為佢係邊位，可以決定老師嘅存亡。我真係覺得我冇時間再俾佢發埋啲小朋友脾氣，一次又一次咁影響我嘅計劃。所以我決定，今日，我同佢之間一定要有個了斷。「講呀！去講呀！我睇下你有冇命行出去同你媽咪講！」我咆哮，冇再用氣音。出面啲喪屍聽到我地入面咁噪，都開始撞門同牆。但我唔驚，夠膽大我。我賤命一條，睇下邊個玩唔起。
「又或者你媽咪已經晨早死咗！」我冷笑。
其他小朋友聽到啲喪屍係到撞，都嚇到掩住耳仔匿埋角落頭。
小森就抱住我隻腳講：「Miss，求下你唔好呀！」而明仔就呆咗咁望住我。我再大聲講：「道歉呀！係咪想一齊死呀仆街！一齊死囉！」
我見到明仔眼眶入面有眼淚，但忍住唔流。而我並冇心軟，繼續大叫：「道歉呀！」
出面啲喪屍繼續衝撞。「對唔住！」
聽到佢嘅道歉之後我終於鬆一口氣。




我贏咗啦！我終於贏咗啦！贏咗呢個不知天高地厚嘅細路。
我放輕把聲最後同佢講：「你同我死埋一邊，唔好再咁多小動作！」
如果唔係的話，我都唔知自己仲會做啲咩事出嚟。
然後我就自己坐埋一邊，背向其他人，門外亦逐漸回覆平靜。當我坐底，其實我成個人都係到震，因為我都好驚。我一面諗，一面忍唔住流眼淚，因為我覺得自己好自私同埋好唔冷靜，岩岩我竟然嬲到不顧所有學生嘅安危大鬧。如果一個唔好彩，成班學生都好可能會因為我嘅衝動而死。如果真係咁的話我就係罪人，所以我真係好嬲我自己。唉！依家可能係啲細路眼中，我已經徹底變成一個自私自利又兇殘嘅人。之後，我只能繼續計劃我地嘅逃亡大計。因為糧食只剩7日嘅量，我要趁我同班學生仲有氣有力嘅時候走，而且我聽講餓死係最痛苦嘅！到時我地都唔知會唔會餓到失去理智食人添。
如果真係咁，我就第一個食咗明仔呢個仆街仔！


#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/