喪"師": 8-會有人再死嗎？

但過咗半個鐘，我聽到頭頂傳嚟聰仔把聲：「Miss，我返嚟啦！」抬頭一望，聰仔對住我天真一笑。今次仆街了！ 
我望住佢呆咗，過咗好耐先反應到。但我冇抱佢落嚟，就咁喺下面問佢。
「聰仔！啱啱條繩斷咗呀！你點返到嚟㗎！」
「係呀！我見到你冇拉我上去，就搵咗張凳仔同埋啲箱疊喺張枱上面，爬上嚟！」之後遞咗一大袋食物俾我。
我拎咗之後，唔敢抱佢落嚟，只能再搵辦法，呃佢返去。
「聰仔！不如咁啦！你再返去再拎啲嘢食嚟呀！你今日行多幾轉，咁之後咪唔使再去囉！」
聰仔面有難色，我知道佢好攰同埋傷口有啲痛，應該想抖抖，但我唔抱佢落嚟，佢都冇選擇嘅餘地，只能點頭應承我。佢咁樣來回咗兩三次，我就聽到佢越嚟越強嘅喘氣同低吼聲。到佢第次返咗去佢就冇再返過嚟。我諗佢已經變咗喪屍啦！我坐埋一邊獨自哀傷，過咗一陣，一個叫小森嘅小朋友走嚟我身邊，問我：「Miss，聰聰呢？點解佢仲唔返嚟嘅？」聽到佢咁問，我眼角嘅眼淚已經忍唔住流咗出嚟。點解？佢喺返唔到嚟，永遠都唔會再返嚟。我應該點同佢地講，我覺得我有責任俾所有人知佢點解會死，因為佢喺為咗我地而犧牲嘅。
「聰仔死咗啦！幫我地拎食物嘅時候俾喪屍殺咗。」小森聽完唔識俾反應，佢走去同其他同學仔講，有啲感性啲嘅小朋友靜靜咁喊咗出嚟。 我心入面好驚，豪仔同埋聰仔都已經死咗，會有人再死嗎？依家，我要令成班學生生存落去，先會對佢地兩個嘅犧牲，所以我唔可以放棄！ 我點算咗我地依家有嘅糧食，應該都可以捱到兩星期。然而，我都開始諗我地嘅逃走計劃，如果我地10日內都冇人嚟救我地，我地都要逃出呢個地方，趁我地仲有力氣嘅時候。幼稚園一出面就有得泊車，我知道校長架車就泊咗喺出面。我有車牌，如果我拎到車匙，話唔定就可以逃出去。我知道校長平時都將車匙放喺櫃筒，校長室喺教員室入面，唔知校長室度門有冇關呢？如果有關的話，咁我可以爬落去搵。 事不宜遲，我即刻爬過望，事關向教員室個邊嘅通風係大啲嘅，我可以入到去。我爬到去校長室上面，見到校長室入面冇喪屍，但道門喺明顯撞壞咗咁，門角爛咗一片，但因為虛掩嘅關係，冇喪屍行入嚟。 我覺得我應該依家就爬落去拎條車匙，因為依家就喺最好嘅機會。
如果我遲啲準備好逃走先再嚟，話唔定到時啲喪屍已經撞下撞下咁入咗嚟。於是我即刻爬落去，靜雞雞，靜雞雞咁爬。我輕手輕腳咁打開左手邊嗰櫃筒，輕手輕腳咁翻咗翻，冇！我再慢慢打開右邊個櫃筒，並且一面望住門嗰邊。度門係磨砂有小小透嘅，我可以隱約睇到出面啲喪屍喺到走動。但當我剛打開右邊個櫃筒嘅時候，門口緩緩緩咁俾一隻喪屍撞開。我反應好快咁埋匿埋咗喺枱底，屏息靜待。





#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/