喪"師": 7-你仲要我殺多幾多個學生先心息？

之後，每次冇曬糧食，聰仔都爬過去廚房幫我地拎啲嘢食過嚟。我亦叫佢數下，廚房入面一共有幾多食物。聽完佢講之後，我估計呢啲夠我地食一個月。呢段時間我地就可以等待救援。正當我以為一切會照我嘅想法發展嘅時候，一件事撒底打亂我嘅計劃。一日，聰仔如常咁爬過去，早前佢過去嘅時候，我係繩個到做咗記號，每次大概放到幾多就可以拉繩。但今次我放繩嘅時候，我發現繩放多咗3米左右，我有啲疑惑，唔通喺聰仔唔小心令條繩打咗結，所以先會咁。我諗住陣間等佢返嚟再睇下。到我放咗佢落去之後，好快個邊就拉條繩，但我感覺到今次拉得好大力同埋好好急。我正準備拉嘅時候，對面又拉咗好多下，係瘋狂咁拉。我心諗喺咪出咗啲咩事，於是即刻好快咁拉條繩，極速咁拉佢上嚟。拉咗上嚟咗之後，聰仔好快就爬返返嚟，好驚咁嘅樣。我問佢咩事。
佢話：「喪屍呀！」
「廚房入面有喪屍？」（唔通喪屍衝咗入去？）
「唔係！我去咗202室！」
「你去個到做咩呀？」（202室放雜物嘅房）
「我喺上面見到入面冇喪屍，所以想落去望下有冇有用嘅嘢！點知落到去見到角落有隻喪屍，佢衝埋嚟。我就即刻拉條繩。」
聽到佢咁講﹐我個心即刻離一離，問：「你有冇受傷？」
佢摸咗摸隻腳，我望到上面嘅抓痕。
「shit！」我鬧咗出嚟。
聰仔見我咁，講：「Miss，我冇事，唔痛，我仲可以過去拎食物。」




我望住佢有口難言，依家已經唔只糧食嘅問題，聰仔已經受感染。佢唔知道自己就嚟要變喪屍。
但佢幫大家搵嘢食有錯咩！唔同佢救過我地，我都要殺佢。但唔殺佢，我地又會死。
我心入吶喊：黑柴呀！點解你要咁對我？你仲要我殺多幾多個學生先心息？我震住咁攬住聰仔：「好！你依家去多次，得唔得？」
「得！」佢忍痛企起身答我。
我托返佢上去，喺放咗佢落地之後，我剪咗條繩。咁樣佢唔夠高上返嚟，就留佢喺嗰邊自生自滅啦！我都冇其他辦法！聰仔，對唔住！但過咗半個鐘，我聽到頭頂傳嚟聰仔把聲：「Miss，我返嚟啦！」
抬頭一望，聰仔對住我天真一笑。
今次仆街了！

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/