喪"師": 6-你嘅勇敢唔需要任何嘢證明

我攬咗攬佢，同佢講：「好！我相信你做得到！我地就靠曬你啦！」
而係放佢過去之前，我同佢都預演咗幾次。我發覺當我扯條繩嘅時候，條繩勒到聰仔條腰好痛。於是我又喺佢條腰到加咗塊布，感覺好返好多，勒得冇咁緊。我試下抱起下佢，都算輕。計埋條繩造成嘅阻力同埋我餓到有啲攰，應該都勉強可以拉返佢上嚟。
試多幾次之後，我托聰仔上通風口，佢眼濕濕咁喺上面望住我。我知道佢好驚，但我都唔可以心軟，再冇嘢食的話我地全部都會餓死。所以我只喺示意佢繼續。
過咗一陣，我feel到條繩被連續拉咗五下，我就開始拉緊條繩，慢慢放。過咗一陣，佢再拉五下嘅時候，我一拉，哇！重到呢！我竟然唔記得佢返嚟嘅時候會拎好多食物同埋水，重咗好多。
但我都堅持用力拉，拉到冇掹緊嘅感覺，我就收手，聰仔依家應該就爬緊返嚟。我好緊張，手心都出曬汗。但一切都照計劃進行，應該冇咩問題嘅。我望住通風口，果不其然，過咗一陣，聰仔喺個到探嗰頭出嚟，笑住咁講：「Miss！」
我即刻抱佢落嚟，拎佢個袋嚟睇，滿滿一袋，有幾枝水，好幾包餅乾同麵包。我感動到眼角有淚，攬住佢講：「叻仔！叻仔！多謝你！」然後，我即刻將啲糧食稍作分配，因為大家都好餓啦！俾班小朋友嘅時候我同埋佢地講：啲食物喺聰仔好勇敢咁幫我地拎返嚟嘅。過咗一陣，聰仔過嚟問我：「Miss，出咗去之後你會唔會頒張證書俾我㗎？」
我聽咗呆一呆，微笑同講佢：「你救咗大家，你嘅貢獻遠遠多過一張證書。」
佢聽完疑惑咁講：「但我媽咪話冇證書等於咩都冇做！」
我拉一拉佢膊頭，等佢靠住我，講：「你嘅勇敢唔需要任何嘢證明，就算冇證書，你喺我眼中都喺最勇敢個個。」
佢依然疑惑咁望住我，我希望佢大個會明白我講嘅含意啦！






#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/