喪"師": 5 -Miss，我唔想死呀！你唔好殺我呀！

「如果你地以後再唔跟我嘅指示，你地嘅下場就好似佢咁。我會送你地去死！」經歷過呢件事之後，班學生都唔敢再逆我意。佢地俾我嚇到想痾屎痾尿都唔敢講，死忍爛忍，有兩個仲唔小心賴咗小小出嚟，臭到我呀！大佬呀！呢到仲邊有衫俾你地換呀！聽話唔代表唔講嘢呀！於是我又同佢地講，要去洗手間唔好唔郁，自己去，我唔會因為你去廁所而殺你地嘅！
之後除咗為咗豪仔痛定思痛之外，我仲要諗方法帶班學生出去。喺呢之前，我地要先解決缺糧食呢個問題。我地嘅糧冇曬，大家已經兩日冇食過嘢，我同啲小朋友都已經餓到個肚咕咕聲。咁落去，我地未俾喪屍殺死都已經餓死。其實我本來諗住經通風口爬過去廚房拎嘢食，但向廚房個面嘅通風口好細，我根本就穿唔到過去，通往教員室嗰邊嘅通風口又唔知點解大啲。但教員室嗰邊都已經俾喪屍佔領咗，我爬過去都冇用。唔通我要叫啲細路爬過去搵嘢食俾我地咩！佢地傻下傻下咁，會唔會攪到命都冇埋㗎！
再過多一日，我地連水都冇埋。我瞓醒之後個口乾到痴線。而啲細佬都餓到精神不佳。於是我喺腦入面不停喺到諗叫個學生爬過去廚房拎食物嘅可行性。個樓底咁高，小朋友爬到過去點樣先可以落返地呢？我又應該派邊個過去呢？派佢過去算唔算喺置佢於危險之中呢？邊個小朋友先至夠冷靜，夠聰明可以成功完成任務？最後，我開始準備送小朋友過去嘅物資。首先一定要一個大袋啦，等佢可以裝好多嘢食返嚟！另外，仲要一條好長好長嘅繩，綁一綁個個小朋友條腰，等佢返嚟都可以跟返條繩原路返回，唔會唔識路，你地都知啲幾歲嘅小朋友成日都傻下傻下，認唔到路，行咗去邊都唔知㗎啦！同埋條繩一定要堅固，咁我可以用力拉條繩慢慢放佢落地。咁岩，我成日帶領小朋友玩遊戲，所以課室有好多道具，有一條好堅韌嘅繩。所以依家萬事俱備，只差一人。我就覺得我一定要搵一個人喺聽話聰明嘅！如果唔喺佢唔會跟，又或者跟唔到我嘅指示都喺大獲。於是我簡咗我呢班入面最聽話又OK聰明個個，謝明聰，聰仔。
當我決定咗喺佢之後，我將佢拉埋一邊。正打算詳細咁同佢講我嘅計劃同埋指示，就見到佢眼泛淚光咁望住我。我望咗佢一陣，唔知佢做咩想喊想喊咁嘅樣。
佢突然同我講：「Miss，我唔想死呀！你唔好殺我呀！」
哦～原來佢以為我想殺佢，我諗我兇狠嘅形象依家已經深入佢地心。都唔知佢地大個咗之後會唔會明白我嘅苦心。但我地依家有冇命生存落去都成問題，我唔理得咁多。
我同聰仔講：「我唔會殺你㗎！你咁聽話，我做咩要殺你呢！」
我開始解釋，我想佢幫我做啲咩！
「聰仔！我地依家已經冇曬糧食，再喺咁落去，我地都會餓死。我希望你可以幫我手拯救大家。因為我覺得你喺咁多個小朋友之中最聰明最乖個個，我相信你一定可以幫到我地。」我讚佢，等佢樂意幫我。
但佢猶豫咁望住我，冇講任何嘢。我冇理佢，因為我已經決定咗，佢就冇選擇嘅餘地。




「放心，呢個任務好安全（我覺得算安全），唔會有危險。由依家開始你要專心咁聽我講，然後記住我同你講嘅所有嘢。知唔知？」
聰仔點頭。
「我要你爬上上面嘅通風管到，爬去廚房嗰到，然後落去拎啲嘢食返嚟俾我地。不過你放心，廚房門喺關嘅，所以入面喺冇喪屍嘅，好安全。你只需要靜靜地咁喺入面拎食物就得架啦！明唔明？」
「明！」佢認真咁答我。
「我會綁條繩係你條腰到，你一面爬嘅時候我會面鬆條繩，你返嚟嘅時候就可以睇返條繩跟返返嚟呢到。你到咗廚房上面嘅時候，連續拉條繩5下，我就會知道你已經到咗上面，我就要用力拉條繩，好慢咁鬆繩，放你落去。到你拎完嘢之後，你再拉條繩5次，我就拉返你上嚟。知唔知？」
「知？」
為確保佢明白我講啲咩，我問返佢：「你到咗廚房上面要做咩？」
「拉條繩5下。」
「要上返嚟嘅時候呢？」
「拉條繩5下。」




「岩！你要記住！我會俾個袋你，你裝啲嘢食入去。拎到幾多就幾多，先拎兩支大水，再拎啲食物，餅乾麵包個啲！得唔得？」
「得！」
我攬咗攬佢，同佢講：「好！我相信你做得到！我地就靠曬你啦！」
而係放佢過去之前，我同佢都預演咗幾次。


#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/