喪"師": 3-只有我一個在乎生存呢件事

「由依家開始你地都唔可以大聲講嘢！如果唔喺！會引到啲喪屍嚟殺我地，我地依家就靜靜地等人嚟教我地，得唔得？」
佢地都點頭，咁我就放心啦！我望住啱啱下午茶食剩嘅餅乾，心入面盤算，呢啲都應該夠我地捱兩日嘅！但我依然覺得好不安，究竟會唔會有人嚟救我地？過咗一陣，我竟然收到校長嘅電話。
「喂！終於打得通啦李老師！！你地冇事呀嘛？」
「我地冇事呀！校長你喺邊呀？」
「我喺醫療室呀！啱啱有個小朋友唔舒服，我陪佢喺醫療室到休息，見到出面出咗事，依家我地匿埋咗喺入面。」
我帶住一絲希望問：「個小朋友喺邊個呀？」
「陳建豪。」
我聽完之後感動到流咗兩行眼淚，原來豪仔冇事。我同校長講我呢邊一切還好，都有啲糧食可以撐兩日。但佢就話佢個邊咩都冇，喺有幾枝水。但我諗有水飲都可以頂到兩日嘅。
但事與願違，我地等咗兩日都冇人嚟救我地，喺呢兩日我地唔痾屎都要痾尿啦！有一兩個小朋友話要痾屎，我都叫佢忍，但痾尿，我就俾佢地痾入個水樽到。因為冇咩食嘢，冇咩飲嘢嘅原因，佢地都冇咩話要去廁所。但你知啲小朋友好中意跟風，當有一個小朋友同我講想痾尿，就會個個都話想。但我就同佢地講，自己企係個個角落頭到痾，輪流痾落個樽到，於是佢地自己都會嫌污糟，忍到最後先痾。期間，我都有打俾校長問下佢地嘅情況。而校長都已經餓到有氣冇力咁。我地根本唔肯定會唔會有人嚟救我地，校長話再喺咁坐以待斃，分分鐘餓死。我同佢講，隔離就喺廚房，會唔會有辦法衝到入去拎啲糧食。但佢話冇辦法，出面好多喪屍，根本行唔開。我好擔心，再喺咁落去，我怕豪仔會捱唔住。
而喺再之後嘅幾日入面，好多小朋友都已經忍唔住要痾屎，我喺狹小嘅課室行咗一轉，睇下有咩物資。我見到我喺小朋友午睡嘅時候帶入嚟嘅N大疊文件，當時其實我想喺佢地瞓緊交嘅時候整理一下，依家可以派上用埸。可以用嚟包住啲屎，撕成細細張，又可以用嚟”炆”屎。然後我再趁啲喪屍唔注意嘅時候，就將用過嘅丟出窗外。我一面分配紙俾要用嘅小朋友，一面睇下啲文件，其實呢啲全部都出面喺想申請入我地學校嘅小朋友所交嘅文件，一個小朋友嘅申請表連證明文件副本都有一個一蚊銀咁厚，入面好多都喺小朋友上course嘅證書。電腦、英文、數學、游水等等。睇到我O曬咀，都唔夠三歲就要上咁多course為攞證書。事實上呢啲對佢入學又喺咪真喺有咁大幫助，其實相比起佢地拎嚟嘅證書，我地校長更睇小朋友嘅態度，面試反應。而且好多人都知道市面上有好多所謂證書，上一日堂就拎到，究竟意義何在呢？算啦！我依家都唔知仲有冇命行返出去，仲使咩同佢關心啲證書保存問題咩。即使解決咗大小二便嘅問題，小朋友被困多日都開始有情緒。尤其個個冇禮貌嘅明仔。




同我講：「Miss我想返屋企呀！」
「我要媽咪呀！」
「我想食嘢呀！」
有啲仲喊埋出嚟，一個喊另一個又跟住喊，我又要安撫佢地，我直頭喺求佢地唔好喊。
「求吓你地唔好再噪啦！」
佢地好似忘記咗我講會死個件事，漸漸咁不受控制，我真喺唔知幾時會俾佢地害死！喺呢間房入面好似只有我一個在乎生存呢件事，只有我為咗生存而努力。我真喺就嚟崩潰啦！明明我連生存都成問題，仲要照顧十幾小朋友，喺佢地面前保持冷靜。而當我再接到校長佢地嘅電話，我真喺就嚟癲！「喂！校長！」
「呀姨！我係豪仔呀！」
「豪仔！你見點呀！」
「呀姨！我好驚呀！」豪仔喊住咁講。
「校長佢流咗好多血呀！佢會唔會死架！」吓！校長受咗傷，點解嘅！我好焦急，因為我怕校長喺俾喪屍咬咗。如果喺咁，豪仔嘅處境就好危險。




我問：「校長點受傷架？佢出過房間嚟？」
「喺呀！佢話出去搵啲嘢食，返到嚟就流曬血啦！」
「好！你俾個電話俾校長！」點算，依架每一分每一秒我都怕校長屍變，我好怕豪仔會有危險呀！
「校長！你喺咪俾喪屍咬咗？」
「喺！」、
死啦！我知道醫療室一眼望曬，根本就無可以匿埋嘅地方，校長屍變之後，豪仔必死無疑。
我忍住眼淚，不停咁逼自己諗辦法，佢喺我呀哥個仔，我一早已經當咗佢喺我個仔。如果佢出咗事，我不但對唔住我呀哥，我自己都會痛不欲生。突然，我望到天花嘅通風管道，我知道呢個喺連接住每間房，於是我即刻拜託校長將豪仔托上通風管道，等佢可以爬過嚟同我會合。而校長自知命不久矣，都非常配合。我叫豪仔袋住電話同我保持聯絡。我聽住電話入面搬抬嘅聲音，焦急咁祉求一切順利。「呀！」
但電話入面突然傳嚟豪仔嘅一聲慘叫，然後對面就再冇佢嘅音訊。除之而來嘅就只有野獸嘅低吼聲。






#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/