喪"師": 2-如果你地唔聽我指示，我地全部都會死

對面嘅教室門突然被撞開，入面好多喪”師”衝咗出嚟。於是我即刻跑去抱起個學生就跑返自己課室，千鈞一髮之際我衝返入自己課室，喪”師”成群咁撞咗落度門到，我退後幾步，遠離度門，屏息靜待。過咗一陣門外就冇咗動靜。睇嚟啲喪屍喺冇思考能力嘅！見唔到獵物就唔會再追住。好在，我係班學生午睡嘅時候會落咗窗邊嘅簾，等房入面冇咁光。所以啲喪屍唔會透過窗望到我地課室入面。我將手上細路放落地下，問佢：「我唔記得你叫咩名話？」我冇教過佢，真係唔太知佢叫咩名。
「余家言。」
「哦！言仔！」
見佢到呆下呆下咁嘅樣，好似都唔知發生緊咩事。呢個時候已經過咗我要叫醒班小朋友嘅時間，但我叫言仔靜靜地坐喺到唔好噪，因為我都唔知班細路起身我要點應付。好怕佢地又噪又喊，攪到啲喪屍衝曬入嚟。就喺班小朋友仲瞓緊嘅時候，我打電話報警，唔通，打俾父母呀哥，冇人聽，打埋俾朋友，都冇人聽。我用手機上網睇新聞睇下有冇咩消息，冇！唔通就好似電影咁，呢個地球已經被喪屍侵佔。我嘅屋企人有冇事呢，唔會已經遇害掛。
我搵唔到救援，又突然醒起，我個姪仔（豪仔）都喺係度讀，喺隔離班，啱啱我望嘅時候冇留意到佢喺唔喺到。為免令同事尷尬，學校冇人知豪仔喺我個姪。我好心急，好擔心，如果佢真係出咗啲咩事，我點對得住我呀哥。但我依家咁嘅境況，出唔到去，點搵佢。正喺我苦惱之際，啲小朋友陸續醒咗。我個班有15個小朋友，其中有個叫晴晴嘅女仔醒咗，每次佢醒都會有起床氣，要喊一陣先。佢父母叫我每次佢起床都要抱一抱佢，哄一哄佢。我見佢醒咗，我即刻衝過去抱起佢。但佢已經開始喊啦！我用氣音同佢講：「乖！唔好喊！」
但佢依然大聲喊，係，佢每次起身都要喊成10分鐘先肯收手。
我即刻喺個櫃到拎啲糖出嚟，同佢講：「乖！食糖！」我將一粒糖塞入佢大喊緊嘅口入面。但佢依然繼續喊。
我已經聽到出面有碰撞嘅聲音，再咁落去，啲喪屍就要撞入嚟啦！我嚇到手都震埋，我開始用手掩住晴晴把口，等佢出唔到聲。佢開始喺我身上掙扎，揮動手腳，打我踢我。但我依然冇放手，雖然我咁樣喺有啲暴力，但我唔咁做，我地喺會死架！喺死呀！
我繼續用氣音同佢示意：「靜呀！唔出聲我就放開你！」一個5歲幾嘅小朋友應該都好聽得明我嘅指示啦！
過咗一陣，佢終於唔再郁，我就鬆開手，點知我一鬆開手，佢又再喊過。我即刻又掩住佢把口。因為其他小朋友亦陸續起咗身。我背向其他小朋友咁做，以免嚇到其他小朋友都喊埋。晴晴終於又靜落嚟，我鬆開手。已經好攰嘅我同佢講：「唔好再噪，再噪我打你！」




到所有小朋友都醒曬，我向佢地做「噓」嘅手勢，指示佢地圍圈坐底，一人俾咗粒糖俾佢地。我喺到諗，我點樣先可以令佢地呢班小朋友完全配合我。我用氣音同佢地講：「你地依家靜靜地聽我講。」
詩詩好似平時咁大聲問：「Miss 你做咩咁細聲嘅！」
我俾佢嚇到心都離一離，即刻同佢做「噓」嘅手勢。
我問佢地：「你地知唔知咩喺喪屍？唔知嘅舉手，唔好出聲。」
冇人舉手，咁啫喺全部日都知啦，應該都有睇過下電影啦！我繼續同佢同解釋，依家我地俾好多喪屍包圍，所以我地唔可以出聲，俾喪屍發現的話，我地，全部，都會，死！我好嚴肅咁同佢地講。佢地呆下呆下咁，都唔知明唔明我講緊嘅嘢嘅重要性。佢地究竟知唔知咩叫「死」，死就喺永遠咁離開呢個世界，喺不可逆嘅！一個小朋友天仔笑笑口咁同我講：「Miss 你呃人！你想嚇我地！」
「噓！你地一個一個咁出嚟睇！」
為咗證明俾佢地睇，我叫佢地排好隊，我遂個揭開小小窗簾俾佢地睇。佢地見到之後，有啲都有嚇咗一跳，我唔知佢地喺咪完全相信，因為佢地呢個年紀根本好多時都唔知道呢個世界究竟發生緊啲咩事！但我只有䀆我嘅能力令佢地明白。佢地望完之後，再圍埋一個圈，我用氣音同佢地講：「由依家開始，你地全部都要聽我嘅指示做嘢！如果唔喺，我地全部都會死，你地其中一個唔聽我嘅指示，其他人都會死，我地全部都會死。你地知唔知咩喺『死』，啫喺，永遠離開呢個世界，永遠見唔到爸爸媽媽，永遠見唔到你嘅朋友。明唔明？」
我覺得我必需向佢地強調呢件事嘅嚴重性，佢地先會完全配合我。
詩詩講：「Miss⋯⋯」
「噓！細聲啲！」




詩詩轉用氣音同我講：「但喺我媽咪話人死咗會上天堂㗎喎！」
「係呀！大人死咗會上天堂，但小朋友死咗會落地獄，因為你地仲未對呢個世界有任何貢獻。」我嚇佢地。
見佢地大概都清楚我講咩！我話：「由依家開始你地都唔可以大聲講嘢！如果唔喺！會引到啲喪屍嚟殺我地，我地依家就靜靜地等人嚟教我地，得唔得？」
佢地都點頭，咁我就放心啦！

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/