嗰晚我喺香港仔隧道穿越咗: 發現

估唔到又要隔成個星期先update到，因為我事忙之外，都要避開啲耳目，唔知點解呢排出街感覺被人跟蹤同監視，我要小心啲，唔係講唔到大家知究竟政府暗地裡搞緊乜。

講返上次，係帆船上被救走，返咗尖沙咀之後，我即刻捉咗肥璋、文仔同星姐三個埋一邊，問佢哋究竟發生咗咩事，點解可以搞到場鬧劇咁大，但得返嚟嘅答案令我開始懷疑係佢哋痴咗線定我發緊夢。

「阿超，你講咩呀？你嗰日同我哋上山放哨，住新界班原居民，點知差錯腳碌咗落山，你唔記得？我哋幾個仲揾咗一日一夜都揾你唔到添，點解你無啦啦會喺班港英賊度出現，仲著埋哂啲奇奇怪怪嘅衫？你點碌到過海嘅？係咪皇帝畀你嘅秘密任務？」星姐反問我，而喺隔離嘅肥璋同文仔都點點頭表示想知發生咩事。

我見佢哋嘅眼神完全唔似講大話，畢竟嗰時識咗差唔多十年，佢哋講真話講大話我一眼就睇得穿，所以面對住佢哋嘅問題，我真係一個字都答唔出，雖然好想同佢哋如實相告，但係佢哋一定唔信，最終只好求其作個藉口話係秘密任務蒙混過關。

不過仲有一個問題我好想知，就係喺呢個世界嘅我究竟係咩人，係咩身份，而呢個問題，我好快已經知道答案。





「麥啓超，皇帝想見你，請你跟我行一轉。」一個乞兒走過嚟傳話，我只好跟住佢行。

尖沙咀呢面同我哋呢個世界好唔同，唔係摩天大廈商場中心，而係木屋平房魚棚豬欄，超落後超原始，連車都無一部，呢刻我覺得佢哋有冷兵器而唔係用木棒已經好神奇。

我跟住傳話乞兒去到一間唔太破爛嘅木屋，入面已經好殘舊，睇落好耐無人住，牆角都生哂蜘蛛網，而九龍皇帝曾灶財就坐喺中間，佢示意傳話乞兒離開，然後起身慢慢走向我，雙眼啲眼淚好似水喉咁係咁流出嚟，男人老狗喊到咁我都唔知佢咩事，更加唔識應對，佢捉住我雙手跪喺地，喊咗十幾分鐘先開口講：

「我一睇你衣著就知你同我一樣喺同一個世界嚟，我好掛住嗰面，好掛住我老婆仔女，好想返去見佢哋，佢哋而家點？過得好唔好？你係點樣嚟到嘅？帶埋我一齊走呀！」

原來佢都係同我一樣唔知點解嚟咗呢面，見住佢咁老又咁慘，我都覺得難過，但對於佢嘅問題，我一個都答唔到。





「曾生，你啲問題我真係一個都答唔到，我唔識你啲老婆仔女，所以唔知佢哋點，我都係胡里胡塗咁嚟咗呢面，我都係啱啱先確定我去咗另一個世界，我都想知點返去，不過唯一我可以答到你嘅係，你係我原來個世界好出名，因為你話九龍城係你祖先封地，但政府唔承認，所以你四圍寫大字講你家族歷史，啲新聞都報導哂。」

「可能係呢個世界嘅我同我交換咗身份，所以佢先會咁，我嚟咗咁多年，一嚟到啲人就話我係皇帝，我都唔知發生咩事，而家聽你咁講，我就明哂，本身以為你係嚟接我走，但睇嚟都係無機會，唔知你會喺呢度幾耐，你要習慣下呢度嘅生活。」

「唯有係咁喇。我想知其實呢個世界發生咗咩事，我又係一個點嘅人？」

「根據我咁多年觀察研究，我得出啲啲結論。首先，呢度存在嘅人同我哋本來世界嘅人係一樣，但可能啲關係就有唔同，不過都唔會有好大分別。其次，呢度嘅香港係分咗新界、九龍、香港島三部分，點解會分我唔知，但三個地方各自都想吞併埋其他兩部分統一香港，而香港島嗰面係英國係背後支持，科技比較發達；新界嗰面就大陸支持，都有啲科技，不過就係抄返嚟嘅次貨；我哋九龍就靠港人自己，乜背後勢力都無，所以係最落後，仲要腹背受敵，所以你見我哋衣著就知我哋經濟狀況，好多人走得都走咗。至於你係呢個世界嘅身份，你係我哋其中一個小小將才，我哋未至於滅亡有部分原因都係因為你啲計仔。」

「原來我喺呢面咁把炮，如果依你所講，即係呢個世界嘅我取代咗我哋世界嘅我？如果佢去到亂咁嚟都幾煩，要快啲諗辦法返去先得。」





「我諗咗咁多年都諗唔到，希望你諗到，我都想返去，但而家未返到去之前，換返套衫，做返好個角色先。」

我接過九龍皇帝遞畀我嘅乞兒裝，換好之後就同埋肥璋、文仔、星姐跟佢返九龍城傾作戰策略。

「係喎，你哋喺齊度，但點解唔見斌哥嘅？」

「斌哥？佢跟屋企人偷偷過咗去新界，雖然佢都係被逼，但事實就係事實，所以呢世都未必會再見到佢。」文仔答我。

「我想知多啲而家嘅戰況，你哋可唔可以慢慢詳細同我講返？」

「係真唔係呀你？平時你最上心，而家竟然唔知道？無問題嘅，三餐飯，哈哈！」肥璋奸笑住講。

都無辦法喇，鬼叫我對呢度一無所知咩，唯有畀佢硬。