嗰晚我喺香港仔隧道穿越咗: 疑雲

sorry各位，隔咗咁耐先update，唔知係咁啱定政府真係做嘢，我上次出完篇嘢之後身邊就發生咗啲怪事，好似警告我咁，所以我去咗避一避，而家係安全啲嘅地方先可以繼續講落去。

上次講到我入咗監倉，我記得佢哋鎖我喺單人倉，但成個倉房入面有好多其他人，但佢哋嘅衣著都係大台啲古裝劇嘅平民農夫咁，同我係出面見啲人著長衫完全唔同。

我諗大概喺監倉過咗半個鐘左右，我努力揾緊個hidden cam，但都係揾唔到，之後終於有人入嚟，呢個人我一眼就認得出，六十幾歲，髮線褪到好後，梳個九一分界，戴住長方形金屬眼鏡，著住套cutting好out嘅老西，戴住招牌煲呔，呢個就係特首曾蔭權，雖然我喺監倉，但總算見到一個我識嘅人，斷估我啲friends唔會連特首都請得起一齊玩我嘅。

「曾特首，我係冤枉嘅，我畀啲friends玩，快啲放返我出去。」

「大膽，唔好喺度嘈喧巴閉，本督都未問你，你出乜嘢聲？你係邊個？邊度人？點解知本督姓曾？同埋特首係乜嚟？」





嘩！曾生你玩到咁大？連特首係乜你都講得出？叛國喎。

「唔好玩啦曾特首，全香港有邊個唔識你？全香港都睇你頭嘅喎。」

「哈，口甜舌滑咁識講嘢？但本督唔會中計，快講，你係邊個？係邊度人？點解衣著咁怪？」

睇嚟連特首都同佢哋癲埋一份，點解佢哋會揾到特首夾埋玩我？呢份生日禮物太難忘啦啩？既然係咁，我都陪佢哋演落去啦。

「我叫麥啓超，係黃大仙住，本身琴日我生日同埋幾個老死去海洋公園玩，揸車走嗰時係香港仔隧道遇到車禍，我拋咗出車外，醒返就係荒山野嶺，之後就行咗嚟呢度喇。」





「黃大仙？即係九龍皇帝嘅人喇，哈，估唔到佢都會派間諜嚟，仲要咁啱畀我捉到，今次真係千載難逢嘅好機會，你哋幫我好好招呼佢，係佢身上拎多啲情報！」

如是者，我接住嗰幾日就日日畀人拷問毆打，好彩菊花守得住，直到有一日佢哋終於帶我出去。

再見陽光嘅感覺係幾好嘅，可惜手腳都被縛住，佢哋帶咗我上艇仔，載我去維港中間嘅一艘大帆船度再捉我上去。

上到去甲板，另一個熟悉嘅面孔出現喇，經常活躍於報章新聞、街邊大小角落都有佢走過嘅痕跡、甚至拍過廣告，另一個全香港人都識嘅曾生──九龍皇帝曾灶財。

甲板上面，兩個曾生針鋒相對、咄咄逼人、互有攻守，詳細內容我唔太記得，但大概係講攜手合作、守望相助、關愛共融、本是同根生，相煎何太急，叫九龍歸順港島，受港島管治，解決九龍腹背受敵嘅困局。





奇怪，乜唔係一向九龍新界都係港島管治咩？而家究竟咩玩法？呢個世界觀點解咁有趣？

九龍皇帝當然一口拒絕，拍枱起身諗住走，曾特首啲人立即舉槍相向，而九龍皇帝啲人亦即刻舉刀迎戰，等等先，點解舉刀？明明而家全世界都用緊槍，你用刀呢啲冷兵器係想搞笑？再睇，九龍皇帝啲人點解衣著咁似乞兒？連九龍皇帝都唔係光鮮得去邊。

「冷靜啲，放低槍，今日我哋係和平討論，唔係流血事件，九龍皇帝，我好有誠意，送份禮物畀你再諗諗。」然後示意帶我出嚟。

「呢個係早幾日喺港島畀我捉到嘅九龍間諜，即係你嘅人，你唔會唔認得啩？我無殺佢，仲好好招呼佢添，而家完完整整咁將個人畀返你，睇吓我幾友善幾有心，哈哈！」

「放屁！曾港督，呢個係咩人嚟？啲衣著咁古怪，我見都未見過。你求其捉個人話係我嘅間諜，仲話好有誠意？」

「咁睇嚟九龍皇帝係一個心狠手辣嘅人，好！小兄弟，你要怪就怪你跟錯人，下世投胎記住跟我喇，幫我丟佢落海。」

喂喂喂，我畀人綁手綁腳，咁落海實死無生嘅，整蠱我都有個限度呀，真係會出人命嘅……

就喺我畀人拉到去船邊嘅時候，九龍皇帝終於出聲。





「曾港督，我一時糊塗記錯，呢個真係我嘅人，畀個面我，唔好殺佢。」

「九龍皇帝，你想我唔殺佢，你只要喺呢張契約度簽個名就得，好簡單。」

「咁即係無彎轉喇！欺人太甚，咁只有強搶！」

大佬呀，人地揸槍你揸刀，點同人打呀？死梗啦……

於是船上兩伙人開始混戰，槍聲、金屬撞擊聲、慘叫聲此起彼落，哀嚎遍野，混亂間有人嚟救咗我，一個我識佢、佢識我嘅人──我其中一位老死肥璋。

「喂，死肥璋，發生咩事？你哋幾個點搞咁大場大龍鳳嚟賀我生日嘅？連特首都揾到咁堅揪嘅？」

「你噏乜？我唔明嘅，不過唔好講咁多，快啲撤退咗先。」





肥璋帶我穿過混戰，安全登上一艘船，船上面我再見到兩個永生不忘嘅人，就係另外兩個老死文仔同星姐，我都未得閒話佢哋，九龍皇帝就連同其他隨從紛紛登船，再以最快速度划返尖沙咀。