嗰晚我喺香港仔隧道穿越咗: 融入

今日偷到啲時間出嚟繼續講我穿越咗嘅經歷，希望可以講多啲我喺嗰面嘅見聞同發生嘅事。

上次唔記得講，喺嗰面嘅九龍城真係成個紫禁城咁，有哂城牆圍住，傳統中國建築，有哂啲乜殿物殿咁，雖然唔係金碧輝煌，但同其他建築比好明顯係靚一截，始終嗰面嘅九龍實在太殘破。

我同肥璋、文仔、星姐去咗一個叫百勝殿嘅地方，入面有好多軍事地圖、戰爭紀錄、戰術策略嘅書，我哋圍坐喺一張大長枱度，枱上有成個香港嘅地圖，上面放哂啲士兵、武器嘅木雕，大概係兵力分佈之類。

縱觀全局，我發覺我身處嘅九龍真係差到無得再差，勢孤力弱，又無咩天然資源，雖然同香港島隔咗個維多利亞港，但距離唔算遠，以港島有英國撐腰，佢啲大炮要射過嚟實在無難度；至於比較大問題嘅係中國撐腰嘅新界，除咗有無限資源support好似開掛咁之外，九龍同新界中間好多部分仲要無點可守，隨時可以長驅直進打入嚟。簡單嚟講就係四面受敵，我真係好佩服點解九龍到而家都仲未被吞併。

係我睇完個地圖對大局有啲認識之後，肥璋就開口講解：「好似你眼見咁，我哋基本上係苟延殘喘、苟且偷生，但係我哋一直無被侵吞主要都係因為我哋啲外交策略同埋我哋啲人係戰場上夠狠。」





「因為大家都知如果唔夠狠，我哋連屋企都會無埋。」文仔插口講埋一份。

「不過好彩你返咗嚟，我哋而家又可以再諗計點維持而家三國鼎立嘅局面。」星姐都忍唔住加把嘴。

乜我喺嗰面係咁把炮，似係出謀獻策嘅軍師，但我對行軍打仗、戰術策略一竅不通，識條鐵咩，我只係識三十六計走為上計，而家要將成個國家嘅命運交喺我手，好重呀。

不過睇得出佢哋對我係好期待，畢竟眼神唔會呃人，我點都要交到啲貨畀佢哋，好彩我讀文科出身，有修中世史，亦都有玩開三國志同aoc，點都識少少外交策略。

「我想問吓我哋同另外兩個地方嘅關係係點？」





「新界會好啲，港島就差，加上啱啱咁救你返嚟，我諗好快又會開戰。」答我嘅係肥璋。

「敵人嘅敵人就係朋友，我哋要同新界friend啲，聯手對抗港島。」

「新界啲原居民真係會幫咩？要揾佢哋鄉議局主席劉皇發傾喎，唔係咁易。」

「鄉議局唔係喺九龍塘咩？喺我哋九龍轄地，我哋應該唔係關係咁差啫。」

「咪玩啦，本身就係嘅，但早幾年你先用計逼走佢哋，而家佢哋係沙田落腳，但你要揾到劉皇發要去元朗，嗰面先係新界嘅權力核心所在，但逼走佢哋件事仲懷恨在心，我哋啲關係先開始交惡，我哋派任何一個人去到元朗揾佢傾根本無可能。」





頂！乜嗰面嘅我做埋啲咁嘅事，揾我嚟搞啫。

「雙方交戰，不殺來使，呢個係戰場上約定俗成嘅規舉，而且今次我會單人匹馬親自出馬，無事嘅，信我。」

「唔係話唔信你，只不過……」

「我決定咗喇，事態緊急，我同皇帝講聲就出發。」我打斷肥璋嘅說話，係因為佢越講我會越淆底，最後會去唔成，所以我要坐言起行逼自己行動，同埋我要去查一吓穿越呢件事同中國有無關係。

不過臨行之前我都知個風險，雖然佢哋三個唔係我原來嘅好兄弟，但我感到喺呢個世界嘅我，同佢哋都係好兄弟，所以我做咗樣從來都唔會做嘅事──擁抱佢哋，然後就去揾皇帝。

皇帝喺九龍殿，我一入到去佢就叫哂啲人出去，我簡單道明來意，皇帝聽完都好認同，所以好快就寫咗封同盟信畀我帶去。

有樣野都要補充返，因為九龍無哂科技可言，所以呢面嘅交通工具只有腳、牛同馬，我喺尖沙咀返九龍城係坐馬車，而由九龍城出發去元朗係騎馬，但我完全唔識騎馬，所以起初都有啲唔慣，坐得好唔穩，直到騎到荔枝角邊界時先好啲。

喺荔枝角出關，就係新界嘅地頭──葵涌，當然入關無咁輕易啦，同佢哋道明來意都要左check右check，搞咗一大輪睇埋封信佢哋先肯放行，不過要入到元朗真係漫漫長路，加上天色開始昏暗，我去到葵芳就揾咗間客棧投宿。





葵芳呢面啲規劃都算完善，最起碼都係石屎屋唔係木屋，錄化都做得好，而且啲人代步用單車，汽車就係軍人用，而衣著都係長衫旗袍，對比我哋九龍，呢面先係人住，難怪斌哥屋企人會偷渡過去。

醫好個肚瞓返一晚，第二日再向元朗出發，不過中間仲有一個地方要去，就係去新區，即係葵涌邨揾斌哥，因為係原來世界，佢係住嗰面，我要揾佢睇吓佢係咪同我一樣穿越咗過去呢個世界。