《職業魔法師:駐急症室解咒師與女助手》: 五:伐魔隊 (2)
的士停在一條屋村前, 現在已接近子夜, 基層為主的公屋路上人煙顯得稀少, 只有老人家坐在便利店前的長椅喝酒, 也有一家大細在廣場空地散步完畢回家中。
「呢邊。」
公屋有著一個小型商場, 都是些髮型屋, 乾洗店之類的街坊店, 超市和肉檔魚檔早已關門, 更別說議員辦事處, 現在開門的只剩下報紙檔和紙紮鋪。
報紙檔只有一個婆婆在看鋪, 看著電視中的外購片, 間中有看更到報檔中的小雪櫃買汽水果汁之類, 而紙紮鋪就在旁邊, 鐵閘沒有完全拉上。
「咦? 咩聲?」
一般而言, 紙紮鋪不會這樣晚還營業的。
那即是說, 現在不是一般情況。
我彎下腰拉起鐵閘穿過, 在昏暗的紙紮鋪的盡頭神櫃前有幾人在站著。
「唔好意思, 閂左門....哦, 沈醫生?」
「嗯。」我點點頭, 白千雪則是有禮地躬身。
我們穿過因為上香而佈著煙霧的貨格間通道, 走到又窄又長的紙紮鋪深處, 可以看到貨格上的都是香燭, 紙錢之類的東西, 而在盡頭處--
「佢唔係鬼上身。」一個年約30, 只比我年輕少少的女生在說, 「佢係思覺失調, 係精神病, 帶佢去睇醫生啦。」
旁邊一個少年被人五花大縛的放在地上傻笑:「一閃一閃小星星, 嘻嘻....食屎狗! 食屎狗!!」
的確, 他身上沒有瑪那反應, 竅也是好好的, 只是精神病。
「咁....好啦, 唔該你頌姐。」
旁邊的一人把少年抬到輪椅上, 另一人掏出利是---
「唔使啦。一場街坊客咩氣。」
二人推著患上精神病的少年離開紙紮鋪後, 只剩下我, 白千雪, 她和她丈夫。
「沈醫生?好耐冇見啊, 老世!」全程她都看著我手上的珍珠奶茶。
「千雪, 呢個係我前助手文頌音, 呢個係我助手, 白千雪。」
「師姐, 你好!」白千雪見到陌生人時總是有點小緊張。
「師咩姐呀, 叫我頌音啦, 你依加就係呢條友既助手啊。」頌音吸一口珍珠奶茶,瞇眼看著白千雪 「真係慘啊...」
「慘...?」
「人工又低, 無啖好食, 急症室又多痴線佬, 再攞命係咩呀? 呢條友24小時都黑口黑面, 好似全世界都睇唔順眼咁, 重話自己討厭人類, 哈哈!」
「留個面黎得唔得...」
「哈, 所以你好自為知啦, 如果有咩事既黎我度啦, 我地鋪頭重差個人執頭執尾, 呢個係我老公阿泉。」
「唔使理我老婆, 佢係咁講野。」阿泉連忙幫她說好話。
「咩叫係咁啊?! 你講多次?!」頌音一腳踏到阿泉腳尖。
「痛! 痛!!」
「兩位真係襯~」白千雪道。
「咩..咩襯啊...」頌音一掌推飛了阿泉, 別過臉去玩著髮尾。
這傢伙根本就是要結婚才劈炮不做的, 硬要說一大堆甚麼人工低之類理由把死貓塞到我嘴中, 雖說也沒錯啦。
「咁你地黎係咩事? 睇在杯老虎堂上我幫到就幫。」
她狂吸一口奶茶放下道。
「要由一單碟仙上身開始講起。」
相對於高高在上, 號令北斗會館伐魔隊的施子雄, 我更相信這種貼地的街坊之友, 而且頌音和我也合作過不少時間, 她值得我們相信。阿泉到遠一點點的粥面鋪買回了消宵, 我們便一邊吃一邊說, 直到碎牛粥清空, 才把事件始末說完。
「依加我地只可以由佢仇人同親戚著手, 大家姐屋企之類。」
「幻人啊...嗯....我見過有單野係咁。」頌音沉思一會後道, 「小學生黎, 成日同D公仔講野, 你知人形既野有幾易出事架啦, 後來老豆老母成日話合隻公仔會郁, 我就搞掂左佢。」
「即係點? 你都係魂具使?」白千雪問道。
「唔係啦, 後山成日好多神像放係度既, 我將個虛魂封住係個公仔度, 再請去堆神像度俾人供奉, 後來就消失左啦。」
這兒說的就是在那些廟宇後的一大片神像, 通常是人們搬家或改信仰時又不能扔掉神像而放到那兒受供奉。
「千雪, 呢度同幻人好似, 所謂虛魂同幻人一樣, 都係由人虛構出黎既野。」我補充道。
「哦...」
「我擅長既地方其實就係比較弱既通靈啦。」頌音喝掉最後一口珍珠奶茶, 「當然比唔上鐘鈴, 阿Jean佢地, 但係都叫幫到街坊。」
「正係我地要既人。」我笑道, 「千雪, 岩岩講到虛魂同幻人一樣, 都係由人幻想出黎既野, 正統魔法師根本唔會理, 但係虛魂有虛魂既好處--」
「好處?」
「就係想像,人既想像力好有用, 簡單黎講, 虛魂由頭到尾都係虛構, 唔係亡靈或者動物靈, 所以設定上自由度非常大。」
頌音的通靈造詣不及鐘鈴, 也沒法與阿Jean一樣使役強大的魂具。
但是正統魔法師看不起的「虛魂」卻是她的法門。
「設定...」
「無錯, 即使唔係存在既人都可以請出黎。」頌音得意地說, 「你地要搵人啦嘛? 咁我知要點做。」
召喚虛魂也是有限制的。首先, 虛魂和幻人一樣, 是基於人們的想像力, 所以召喚出來的一定是受廣泛認識, 在互聯網普及前虛魂術幾乎滅亡正因為這一條件。
「其實唔係咩神奇既事啦, D人乩靈, 其中最常見既就係召喚出齊天大聖孫悟空, 但唔好唔記得, 大聖爺佢係小說人物, 係吳承恩係西遊記中虛構出黎既角色, 只係透過廣泛流傳而成為可以召喚既神明。所以召喚出虛構人物早有先例。」
頌音一邊清空鋪面一角, 一邊解說給白千雪聽, 同樣是作為我助手進入魔法界的她, 很了解白千雪的心理吧。
「我地要召喚咩靈? 如果係奸角, 或者是洛基個種邪神點算?」白千雪憂心地說道。
「洛基...哦, 北歐神話個個, 神係唔得啦, 虛魂通常弱好多, 就係因為要咁多人識但召喚出黎都係咁弱, 性值比太低, 呢種法術先無人研究。好, 搞掂, 最後就係觸媒---」
「係雷神個個...」白千雪低聲地說。
清空了一小片空地的頌音拍拍手上的塵, 丈夫阿泉為她抹去細汗, 交給她一本書--
「個本係...」
「圖書館借黎既。虛魂召喚要相關觸媒, 除左大聖爺最出名個D, 始終我地要召喚既無佢地咁出名。」
書的類型是翻譯小說--
書的作者是來自英國的柯南道爾爵士---
「虛魂在上#$%^」頌音念動咒言, 大氣瑪那湧動, 法陣旁的燭光被吹動--
書的名字是<<巴斯克維爾的獵犬>>--
「來也!!」
主角名字是那個舉世知名的神探!!
頌音完成了儀式, 坐了下來看看我們:「哦, 魔法師?」
「嗄..?」白千雪不解。
「依加個位偵探正附於頌音身上... 顧問偵探先生, 你點睇件事?」
「等陣先。」頌音如紳士一樣, 優雅的高舉手掌示意我們停下來, 是在讀取頌音腦中的情報吧, 這也是虛魂術不受歡迎的原因之一。
如果不是事先說明大概白千雪會以為我們瘋了吧。
「時間唔多..我長話短說。」幾秒後, 不抽煙的頌音現時卻從我身上扒掉香煙點著吸了一口, 「唔錯...好, 溫可柔佢依加會等籃球決賽完結先殺人, 佢要做既唔逃亡, 亦唔係追殺, 而係拖延被你地搵到既時間....點樣買飯? 住邊度? 如果搶劫之類既話就會引黎注意....你地既方向錯晒, 仇人同親戚度都唔會搵到, 你地同雷斯垂德一樣啊, 兩位。」
「咁正解方向係..?」
頌音眼神中閃動睿智:「佢逃離時係學校上緊堂, 身上根本咩都冇, 屋企咁易既地方相信北斗會館早已經搜查過, 佢亦唔會乖乖地係屋企等你地, 咁樣既話佢要點過呢一星期?」
我有點明白了。
「醫生, 你睇你已經明...佢一定要有人幫, 先可以係唔被你地發現既情況下過到呢一星期, 咁樣既話答案已經呼之欲出....」
我道:「千雪, 聯絡夏夏呼!!」
「係!」
「唔錯....我以為相當明顯。」
「偵探先生, 唔係咁易既。」
頌音正恍動身子, 時間到了, 虛魂本來就不存在於世上, 只是由人創作出來再廣泛流傳而成形, 能現身的時間本來就極短。
「最後...」顧問偵探抽多一口煙, 「除非殺死施法者, 鏡迷宮無法從內部打破, 個時到底點解鏡迷宮會破壞? 」
咦..
這問題!!
「好高興見到你, 解咒師先生。」頌音放下香煙, 拍拍身上向我輕輕躬身, 然後頌音白眼一翻摔坐到凳子上, 阿泉連忙走到她身邊扶著。
「咳...咳!! 咩味! 好臭! 煙?! 頂我都估到...點呀, 佢講咩?」
「夏富。」我給她遞過一杯水, 「佢一定幫緊溫可柔渡過呢個星期。」
「醫生, 夏富話聽日想見我地。」
白千雪放下手機道。
「你地今晚係度過夜啦。」頌音喘定了氣道, 「我地有房。」
距離籃球決賽, 六天。
現在, 我們暫時走在北斗會館的前頭!
晚上我睡不好, 始終現在事件正向著一發不收拾的方向發展著。新聞已經出了, 明天報紙也會登, 報導指是體育館外發生煤氣外漏引發的爆炸而炸死了人。
那傢伙似乎是大家姐家中建築公司的工人。至於為甚麼他會效力於千金小姐就不得而知。
反正, 我們現在的任務是要制止溫可柔的暴走。
第二天早上起來我有點頭痛, 睡在我旁邊的白千雪也累壞了, 少有的比我還要晚起來。
「千雪, 起身啦。」
「嗯..? 沈醫生..早晨...」白千雪睡眼惺忪。一連串的事件和戰鬥, 是她這三年來從沒有經歷過的吧。恐怕, 還會二不離三。
我飛快的輸入夏夏呼的電話:「得返六日, 獵戶座一定都行動緊, 依加我地要Keep住領先係佢地前面....喂? 夏夏呼??」
「阿然...你痴線架, 幾點呀..」
「九點幾你都未起身, 你對得住出面返工既人啊?」
「我唔使返, 吹咩...哈欠..」
作為北斗會館最低人工的人, 有種想揍他一頓的沖動。
「總之, 我同千雪會黎搵你啦。」
「嗯...等你啊, 我恰多陣先。」
把電話掛掉我, 我道:「千....」
她正伏在我腿上睡回籠覺。
真是的....
我再次打開電話的通訊軟件--
[遲D到, Sor]
最後我們到達圍村的時候已經是下午時份。夏夏呼是原居民, 天生就有丁權, 起了丁屋後這傢伙把其中三層租給了別人, 於是他不用工作就每月有一兩萬的收入, 根本不用工作, 盡情沉迷上網, 在他遇上溫可柔前, 這傢伙可是三天不洗澡, 只吃外賣的人。
「沈醫生! 做咩唔叫醒我啫!」下了紅VAN後, 白千雪卻有點生氣。
「你講今朝?」
「係呀!」
「咁你眼訓啦嘛, 我俾你訓你反而嬲..?」
「我先唔係! 我尋晚溫書溫太夜咋嘛!」
「溫書? 溫咩書?」我施咒使村門口那隻想吠叫的狗睡去。
「你之前俾我D Note呀, 我Save左落電話睇。」
「轉死性啊? 突然咁勤力。」
以往的白千雪可是說著「反正只要被你強化, 你消去對手既魔法我沖上去打佢一獲甘既得啦」的等等無視我的教導, 現在竟然自動溫書?!
「..因..因為頌音師姐佢..好勁。」
這樣啊。原來是看到自己的前輩派上用場, 反而刺激起白千雪的奮鬥心了。
「你都好幫到手啦。」
「但佢連唔存在既人都召喚到..我覺得自己好似...」
「無用?」
「嗯..」
我安慰她:「人人都有自己定位, 唔好太上心。」
「哦..」白千雪輕咬下唇,看著地面, 一臉不甘心。
「好啦, 幫我搵7號屋出黎。」我輕撫她瀏海。
「係!」馬上回復精神了呢。
圍村內有不少街坊都看著我們, 大概是少見到陌生人吧, 還好沒甚麼阻礙。白千雪很快就找到了七號屋, 我按下門鈴--
「叮噹~」
殘音回響。
然後大門打開, 夏夏呼出現在門後。
我佈下紙鶴到附近當閉路電視警戒, 然後推門進內。
「你黎, 係同溫可柔既事有關?」
「佢係咪搵過你。」我決定單刀直入。
「...係, 佢尋晚黎搵過我。」
和頌音說的一樣呢。如果我們去找她的仇人或朋友, 現在還在團團轉吧。
「佢依加係邊。」
「佢..發生咩事?」夏夏呼雖說是靠父幹才能在這年紀達到了財務自由, 但他可是一點也不笨, 長期流連於各大論壇的他更可以說是見多識廣。
「我地要...同佢傾下。佢有D官非係身。」
說是官非, 已經是相當的客氣。
「我拒絕。」
...嗯?
這傢伙, 一向沒甚麼火, 竟然拒絕了我?
「夏夏呼, 呢件事唔係你可以插手。」我雙眼射出精光威脅, 「佢係一個好危險既人, 你包庇佢既話你都會有危險。」
「危險?」夏夏呼任無恐懼, 「我尋日見到佢既時候, 我只見到一個可憐既人!」
她現在是殺人犯!
「我地無惡意架!」白千雪急忙解釋道, 「我都係企係可柔個邊!」
「無人企係佢個邊, 除左我!」夏夏呼少有的固執, 「你地唔使指意搶走佢!」
原來是這樣嗎? 他正在享受自己做護花使者的角色, 所以連見也不給我們見。可惡, 如果不是受北斗會館法度所限, 我就要這傢伙求生不得求死不能的說出一切!
「我地係幫佢。如果你咁落去, 下次黎既人, 就唔會咁樣坐低慢慢同你傾。」
「但...」這傢伙, 一生人都沒有這樣與人激烈的衝突吧, 現在連手也在抖了。
「你點先信我地。」
「尋晚可柔同我講.....」夏夏呼站起來, 「唔好相信任何人。」
糟了, 是洗腦嗎?
「佢仲同你講左D咩。」
「佢仲話, 佢只會處決罪有應得既人, 佢無做錯任何野, 依加只有我可以制幫佢。」
這女生, 在利用人方面有點利害啊。
「所以....」夏夏呼後退兩步, 「對唔住啦, 阿然。」
突然, 天花板發出巨大的「噗」一聲, 一個繩網從天上向我們罩來!
「沈醫生!!」白千雪飛身沖向網子, 連人帶網往旁飛摔撞倒了飯桌上的雜物, 她為我擋下了網子!
「你痴撚左線啊?!」我連忙走向白千雪, 但是夏夏呼竟然揮刀向我砍來!
自我強化!
「噹!」魔法瞬間發動, 刀子斬到我手臂上, 卻沒法傷及我一分一毫, 而是發出金屬的相撞聲音!
「下!?」夏夏呼大吃一驚!
「哼!」雖說我擅長的都是防禦性魔法, 但是--
定身!
夏夏呼如當日威sir一樣沒法彈動, 他的手上刀子掉下, 我輕輕接著指向夏夏呼:「好啊...夏富...」
「冷靜D先大佬!」
「我地岩岩好言相向你咁對我地?」
「我..我都係想保護女神啫!」
「我唔理你。」重力被我操縱, 他全身受壓跪下, 「你傷到千雪, 咁就唔同玩法。」
「喂! 喂!」
「原來以暴易暴係呢種感覺啊.....哈哈..!!」我一刀插向沙發, 沙發噴出棉花嚇得夏富失聲尖叫,「你好搞唔搞搞到千雪, 睇黎你都係厭命長架啦。」
「唔好呀大佬..」
「停手!」身後傳來一把女聲, 風壓暴增!!!
引到她出來了!
萬咒寂靜的休止符!
手背光芒閃動, 風壓消失, 站在那兒的只有溫可柔一人。
找到了!
「千雪!」白千雪被我強化, 一手拉斷如公仔麵似的漁網沖向溫可柔, 但是她竟然---
沒有反抗?
「點解唔反抗。」我以刀子架在夏夏呼的雙下巴前。
「我...我無資格。」溫可柔低下頭, 流下眼淚。
「如果你再傷到白千雪一條頭髮既話, 夏夏呼...」我收起刀子,「我保護憑我醫生既資格, 可以盡可能令你死前受最多既苦。」
別開罪醫生, 各位。
「係! 係!」
「依加, 道歉。」
「認真咩?!」
「你估下?」我把刀背貼著他眼皮。
「對唔住啊白千雪小姐!」他五體投地的跪在地上。
「好啦, 唔好咁啦沈醫生。」
始終白千雪對人還是太善良。
沒見過我兇殘一面的夏夏呼驚魂未定, 只能默默執起雜物看著我, 這倒好, 使他怕上我一陣子吧。
「有冇傷? 痛唔痛?」我問白千雪道。
「無事啦, 沈醫生你太大反應。」她卻笑盈盈的道。
「估唔到咁快會俾你地搵到。」溫可柔道, 似乎她已經冷靜了下來。
「你俾呢個人搵到你, 相信你都心服口服。」說的就是頌音召來的世界最強偵探的虛魂, 「不過, 我地講返正題先?」
「我..我知道我係...」
我點點頭, 因為我已經對夏富施了耳鳴的咒語。
「..我係殺左人。」
「咁你依加有咩打算。」
溫可柔眼中閃爍憤火:「我無錯!!佢地想對我..對我...」
白千雪搭住她手背:「唔使講, 我地明既。」
「自衛殺人既話, 其實可以講得通。」我沉思片刻後說, 「咁樣起瑪可以幫你辨護, 但係..如果你堅決要係籃球決賽當日殺埋大家姐佢地既話....我地好難幫你。」
溫可柔卻斷言拒絕:「唔得。已經無得返轉頭, 依加我始終係殺人犯, 殺一個係殺, 殺晒都係殺, 我要佢地付出代價!」
正如我說過, 除非溫可柔自己想通, 不然我們怎樣做也沒用, 只要有機會她就會召喚幻人復仇。
「可柔, 咁樣唔值架。」白千雪苦心婆心地說。
「千雪, 你有人錫, 有人保護你, 你未試過呢d情況, 你唔明!」溫可柔還是被復仇占據著。
「我唔明, 點解你唔轉校?」
「唔係轉唔轉既問題, 如果我走左, 只會有下一個受害者, 佢地一定要死!」
幻人在遠處顯現, 只是沒法靠近受休止符保護的這邊。
沒想到, 溫可柔骨子裡的爛好人性格還害了她。
「可柔, 咁樣會有咩後果你好清楚, 我同你講過北斗會館係有伐....」
日頭不要說人, 一說曹操, 曹操就到! 就在剛剛, 外面的紙鶴就看到了有伐魔隊的人進村!
被跟蹤了嗎?!
「沈醫生?」溫可柔問道。
....糟了。
「可柔, 你信唔信我。」