[人生哲理]《黑白的世界不止於灰》: 28 出不去的住宅區(3)

李經理一直回頭望，望著佩盈，焦急得想下車。
 
佩盈走了過來，我坐進車廂，同時伸手把她迎接上車。
 
明月姐關車門，然後回去駕駛座，繼續響安。
 
「呠、呠、呠——」響安聲驅趕著李經理的私家車。
 
逼近他駛前一點，空出位置給我們繞過。
 




黑色超長轎車繞過灰色私家車的時候，李經理快氣死了。
 
這時，何諾兒走近灰色私家車，要拉李經理下車。
 
「你哩個賤男人，背住我搞其他女人？食女職員？」她大聲責罵。
 
路人停下來，看熱鬧。
 
「小姐，你……邊位？」李經理問，不願被拉下。
 




「琴晚係房間你就認得我，係街就唔認得？」何諾兒繼續指責，裝無辜欲哭。
 
人群愈來愈多，包括公司職員。
 
「喂……我……」李經理百口莫辯，只好踏油門，開車離去。
 
留下何諾兒在街上。
 
我們在長身的車廂中，白色的燈光下，看著一桌子的美食。
 




坐在最前頭的明月姐，回頭說，「等埋我先食。」
 
「明月姐，好多年冇見。」佩盈說，坐到鄭健旁邊。
 
桌子很長——
 
對面是佩盈和鄭健，我獨自坐在另一邊。
 
我一邊開外賣盒，一邊等明月姐停車。
 
雞腿、雞翼、炒飯、菜、番茄炒蛋等等都有。
 
「點解會有咁大部車既？」佩盈問。
 
「因為我搵左份兼職，去左做代駕。」明月姐在前面喊聲，扭軚盤轉彎，「部車係車主借比我既。」




 
終於找了一個安靜的位置，泊好了車。
 
「咔嚓——」開車門，明月姐上車，又關上。
 
明月姐坐在我的旁邊，肚子很餓，想伸手去拿。
 
「今日係咪有咩特別事要慶祝？」佩盈問，望著我們三人。
 
明月姐停了手。
 
我望著鄭健，鄭健看著我，最後由他開口。
 
「係咁既，老豆我有一個諗法。」鄭健抓起女兒的手，特別認真。
 




佩盈看著老豆。
 
「哩幾年你去左讀書，畢業之後又四圍打工，都好耐冇返過我地以前住嗰度。」鄭健說。
 
「當年地震之後，好多危樓都已經拆晒，重建左好多新樓，成個區唔同晒。」鄭健說，「不如，我地返去？」
 
「我地兩父女，開一間店？你可以將自己既設計，交比工廠整，然後拎黎賣。」鄭健提議。
 
「另外，老豆哩年黎，都有接受訂製，幫客人度身訂做適合佢地既帽。」他說，「如果開店，就可以有更多客人。」
 
「或者……」
 
「或者我地一齊合作，專賣兩父女設計既帽？實現你細個時候既夢想。」他終於說出口。
 
鄭健說完後，就等待佩盈回覆。




 
「老豆，哩個唔係我細個既夢想。」佩盈輕聲說。
 
「佢仲係我一直以黎，奮鬥既目標。」她彷彿等了很久，字字用力。
 
「所以，你既答覆係？」鄭健感動了。
 
「我地一齊返去，父女拍擋，開一間帽店。」佩盈眼濕了，仍然笑著。
 
我起身拍拍鄭健的肩膀，他抹了一下眼淚。
 
明月姐馬上倒灰色橙汁，一人一杯。
 
「今日，慶祝佩盈脫離苦海，慶祝父女打算實現多年黎既夢想——」明月姐舉杯。
 




大家一起握杯。
 
「飲杯！」四人齊說，都舉杯碰撞，然後回嘴喝下。
 
「開餐喇！」明月姐放下杯後，就拿起竹筷子。
 
大家都爭相夾餸，爭相吃飽，爭相喝飲料。
 
直至剩下一部分，留給一個人——何諾兒。
 
過後。
 
我把剩飯包裝好，明月姐回到駕駛座開車。
 
兩父女在商量各種大計，交換想法。
 
包括什麼時候起行。
 
我跟旁邊的花一樣，默默地坐著。
 
聽著的，都是令人欣慰的說話，都是沒有我的計劃。
 
「好喇，應該到左佩盈樓下，大家落車，記得帶齊垃圾。」明月姐在駕駛座說，車已停好，「我要去還車。」
 
之後，我們三人站在街上。
 
目送黑色超長名貴轎車絕塵而去。
 
我仍然抱著花束，由李經理買卻被家姐截下來的花束，以及一盒剩飯。
 
鄭健看到這樣的我。
 
「阿盈，我有啲急，上去去廁所先。」他說，「你要去丟垃圾，就去啦。」
 
「哦。」佩盈翻手袋找鎖匙，挽著剛才車上的垃圾。
 
她把鎖匙交給鄭健後，鄭健就上去了。
 
「我……送你。」我結結巴巴，仍抱著花束。
 
「送我去丟垃圾？」佩盈問。
 
「嗯。」我應了聲。
 
數十米的步行路程，很快就走完。
 
佩盈把垃圾放進垃圾桶了，放好蓋子，回頭面對著我。
 
隻字不言，靜默相對，我就這樣看著她。
 
昨晚我強行截停自行車，要把她載出去。
 
今晚的我卻想一直出不去。
 
過了片刻。
 
「紮花……你留比第二個人架？」佩盈問。
 
「係比你。」我舉出了花束。