消失的五年: 《四十五》

郭健東，冷靜啲，到咗呢刻，我諗我開始估到少少，當年莫心蕙因感情學業問題跳樓輕生， 而呢個自稱 "老朋友" 嘅仆街，一定係佢親人或朋友，過咗咁多年後，佢緊係發現咗啲嘢，認為我地五個係害死莫心蕙嘅凶手，所以要我地五條友一齊陪葬！


我同莫心蕙唔熟，點解會捲入呢件事，個導火線可能就係因為張戲飛，張飛後面有出現過 "郭同學" 嗰個稱呼，所以條仆街就認為我有份！


雖然我唔可以肯定成件事係咪咁，但係 …… 如果我所諗嘅係真嘅話，因為呢啲原因响咁多年後嚟報仇，條友真係黐撚線到極點！


莫心蕙發生咗件咁嘅事，當然無人想，我唔知道當中係咪真係涉及我地咁多人，但係點都好，都唔駛害死咁多人，同摧毀我嘅一生 ……






就係呢個時候，部電話響起，係個仆街留低嗰部電話，一接，對方就講


「早晨，早晨，郭同學，食咗早餐未先？瞓得好唔好？」


「廢話少講，你想點撚樣！」我急不及待就問






「嘩嘩嘩 …… 晨咁早就咁好火㗎，關心吓你都唔鍾意，點啊，咁早去圖書館溫書呀？你都算係咁喇，做通緝犯仲咁博學，求知慾真係強，諗唔諗住喺監獄度報番個學位咁啊！」個男人無理會我講嘅嘢，繼續講


「你要我做嘅我都做晒，你仲想我點啊？我老婆同個仔點啊？」我追問


「佢地呀？唔 …… 無事啩！頭先睇過，個仔好乖啊，一粒聲都唔出瞓响地，唔知係咪死咗呢？哈哈哈哈 ……」個男人語帶輕挑咁講






「屌你條仆街，佢地有咩事，我一定搵你陪葬！！」聽完佢咁講，我忍唔住就話


「我？哈哈哈 …… 死，我一啲都唔怕，最驚無你地陪咋，哈哈哈 …… 」個男人一邊大笑，一邊講


「你真係黐撚線㗎！」我咬牙切齒咁話


「哈哈哈 …… 你唔係依家先知呀？哈哈哈 …… 好喇，時間差唔多，係時候派成績表喇，但係嚟之前都要做少少嘢喎，見面緊係要著靚啲啦，禮貌嚟，都唔駛我教啦，之後同我去旺角花墟，嗰度有間昌記花店，佢啲花又靚又新鮮，同我買紮粉紅色玫瑰！記住要粉紅色喎！」個男人吩咐我


「你又想玩咩啊？」我問






「阿蕙最鍾意粉紅色玫瑰！」個男人忽然好平靜咁講


「莫心蕙 …… 乜佢仲未死？？」我帶點驚訝咁話


「買完你咪知囉，哈哈哈」個男人講完之後就收咗線


「喂、喂！！」


望住部電話，我腦海一片混亂，究竟莫心蕙係咪真係未死，如果係真，一切一切 …… 係時候嚟個了結！