消失的五年: 《四十四》

我將所有報紙入番晒落文件夾，起身，再次行向櫃檯，同嗰位小姐講 


「唔好意思，呢啲我睇晒，我想睇一九九五年五月六日嗰啲報紙！」 


「無問題，麻煩你等一陣！」 


今次一定唔會有錯，五月五日只係發生件事嘅日期，今日發生一定要第二日先至有報導，所以我要搵嘅報紙係六號，而唔係五號！ 






攞住個文件夾，行番去梳化度，望望日期 "九五年五月六日"，由頭版開始逐版揭，就喺港聞版嘅最後嗰幾頁，我發現有一篇咁嘅報導 


「昨日下午有途人行經翠屏邨翠柳樓對出時，傳來巨響，查看發現有人從高處墮下，立即致電報警。警方接報到場，發現一名十七歲莫姓少女昏迷倒卧翠柳樓對出，氣若游絲，事後由救護車送往聯合醫院搶救。莫女抵院後仍有呼吸脈搏，接受緊急手術後隨即送往深切治療部留醫，其家人接獲警方通知後趕抵醫院了解，在病房門外憂心忡忡。 


警方事後到翠柳樓調查，期間於平台發現一個粉紅色書包，懷疑為莫女所擁有，警方與其家人及朋友了解後，得知她最近感情和讀書兩方面受困擾，因而跳樓輕生，警方調查後相信並無可疑。」 






翠屏邨翠柳樓，莫姓少女，十七歲，應該係呢篇喇，原來當年曾經發生過一宗咁嘅意外，我真係完全唔知，亦都無留意呢單新聞，就算係咁，又點解會同我地有關？


咪住先，好似有啲嘢唔妥，我响銀包摷番張舊戲飛出嚟， 


"一九九五年二月二十日" 






反轉一睇， 


"今天很開心，可以和郭同學看周星馳的西遊記！"  


如果件事同莫心蕙有關，條仆街寄得呢張戲飛比我，咁呢張飛就肯定唔係鍾可晴，而係莫心蕙嘅，但 …… 我印象中真係同鍾可晴睇過西 …… 遊記，周星馳嘅 …… 西 · 遊 · 記！！ 


西遊記！！我用手機打 "一九九五年電影"，click 入維基百科，發現 


真係，西遊記真係分兩集，《西遊記第壹佰零壹回之月光寶盒》同《西遊記大結局之仙履奇緣》，我同鍾可晴睇嘅應該係第一集月光寶盒，而大結局就 …… 好似 …… 好似 …… 我好似係自己一個睇，但係點解張飛背後寫住 ……. 






當年 …… 唔通 …… 當年 …… 嗰個 …… 女仔 …… 


我記得當年，有一日放學之後，肥仔華失驚無神隊咗張戲飛比我，話請我睇戲，叫我準時七點半喺戲院門口等，點知去到又唔見人，我見有飛喺手唔好嘥，於是一個人入咗去睇，開場無耐，有個女仔坐咗响我隔離，戲院黑孖孖，望一望，都唔知乜水，咪照睇囉，點知睇睇吓，個女仔忽然挨喺我膊頭度喊，咁嘅情況，我都唔ࣲ好意思推開佢，直至完場，個女仔粒聲唔出就起身走咗，我都無將件事放响心，淨係第二日番去屌鳩肥仔華放飛機！ 


照推斷，呢個女仔原來就係莫心蕙！