消失的五年: 《四十六》

收番好啲報紙，交回櫃檯，就迅速離開圖書館，越係接近迷底，不祥嘅預感越強烈，究竟個結果係咪我所預期同可以承受？！ 


消失咗五年，就好似只係過咗幾日咁，但呢幾日所發生嘅嘢，係我從未遇過咁可怕，失望、無助、驚惶、欺騙、仇恨、內疚 ……，如果過埋今日我仲有明天，我會應該用咩原則生活落去，如果仲有 …… 明天 …… 


攞起電話，打出，跟住就講 


「係我，可唔可以 ………….…………，麻煩晒你，一陣地鐵站等！」 






時間 : 13:13 


攞完嘢，一出太子地鐵站，沿警署去花墟，今日二月十三號，星期四，雖然係平日，但人來人往，好多西裝友襯食飯時間過嚟訂花，訂聽日情人節嘅花！ 


每年呢一日，我都會出嚟花墟，花少少時間，揀一紮花送比家怡，氹吓佢，諗起佢收到花個樣，咩都值得！ 






今日，我同往年一樣嚟到，行過我幫襯開嘅花店，仍然係嗰兩位小姐，但係望真啲 …… 原來 …… 好多嘢都唔同晒！ 


昌記花店，我行入去，同個售貨員講要一紮粉絲色玫瑰，揸住呢紮玫瑰，感覺有啲諷刺，情人節前夕，買一紮花送比一個害到你家破人亡嘅仇人，你話幾咁可笑吖！ 


一切都準備好，就喺呢個時候，部電話響起，一按，傳嚟一把熟悉不過嘅聲音， 






「郭同學午安，點啊，照計應該買好晒嘢囉！駛唔駛比少少時間你食過 tea 先！？」 


「唔駛，快啲講你喺邊！？」我就答 


「哈哈哈 …… 好掛住我呀？！幾個鐘無見啫，駛唔駛咁心急啊！係呢，有冇睇電視新聞啊？哎吔，我唔記得你貴人事忙，應該唔得閒睇㗎喇，你依家越嚟越出名喇，警方認為俊龍同一斌兩單嘢都同你有關，你真係威過威士忌喇，哈哈哈」個男人大笑咁講 


「仆街，你玩撚夠未啊！我做錯啲咩咁大不了吖，講啊！」我大聲咁話 


「乜你仲未知呀？唉 …… 我真係對你好失望，不過算啦，為我份人無嘢好，最大優點就係鍾意幫人，你張成績表準備好喇，睇下先，依家兩點，嗱，比埋時間你痾屎，約實你一個鐘頭後响屏廈路森記貨倉等，嚟到自己開門，唔好遲到啊！哈哈哈 …… 爸B，救我啊！哈哈」個男人講完就收線 






「你條仆街！！」 


屏廈路？！响天水圍，森記貨倉 …… ，仔，你頂住，爸B趕緊嚟，你唔好有事啊！