消失的五年: 《三十八》

「你笑撚夠未，我問你啊，你究竟係邊個？」 


個男人聽到我咁講，即時停止無再笑，就係呢個時候，喺無任何先兆嘅情況下，佢用力一揮， 


「啪」一聲， 


支 "S" 字型鐵筆嘅勾位完完全全插入俊龍後腦，只見俊龍即時吐血，個男人連隨一拉，腦漿血水四濺， 






「唔好啊！！！」我大聲咁嗌，可惜 …… 已經太遲 …… 


只不過係一瞬間，俊龍 …… 已經爆頭慘死 …… 


又有一個人白白犧牲，望住眼前咁恐怖嘅畫面，我嘅鬥志已經撤撤底底咁被摧毀，由一開始到呢刻，我根本就係一個公仔，任人愚弄嘅傻仔，企响我面前嘅，就係累到我家破人亡，累到我乜都無晒嘅仇人！！！ 






「點解？點解啊？我同你無仇無怨，點撚解要攪到我家破人亡，仲要屈鳩我殺人，你究竟係邊個？」 


「哈哈哈哈，你唔記得我呀？哈哈，但我呢世都記得你喎，比時間你，慢慢諗，我都唔急，哈哈哈哈 ……」個男人一邊大笑，一邊講 


「諗你老母！」 






「啄啄啄，好似好嬲咁喎，點吖，好想知點解呀，你諗下你舊時做過啲咩衰嘢，郭 · 健 · 東 …………」個男人嘴角向上戚，用好鄙視嘅眼睛望向我 


「你係邊個啊？我究竟做過啲咩要咁對我啊，仆街！！」我已經無辦法再冷靜落嚟 


「一個、二個、三個、四個，全部齊晒，要死嘅都已經死晒，未死嘅，暫時都唔駛死，點啊？個遊戲好唔好玩啊？」個男人揸住支鐵筆搖嚟搖去 


「好玩？你條仆街變撚態㗎，攞人命嚟玩，快撚啲講啊，你究竟係邊個啊？」我雙手揸實支棒球棍 


「唉 …… 比咗好多提示㗎喇，你成日問我係邊個，點解你唔用下你個屎忽諗下我曾經講嘅嘢？」個男人一冠笑容滿面 






我已經亂到唔想再諗任何嘢，…………………… 由尋日酒樓到依家，佢講過啲咩特別嘢？應該無啊，酒樓，無，酒店，無，响車 …… ，响車佢講過 …… 一個名 …… 係 …… 


「莫 · 心 · 蕙 ……」


「莫心蕙 ……，件事同莫心蕙有關？ 你係佢邊個？」我指住個男人問 


「算你個屎忽有啲用，我係佢邊個唔重要，下一個問題又嚟，咁你地五個又同莫心蕙有咩關係呢？」個男人隨住音樂咁跳動 


「我同佢只係曾經同一班，一啲都唔熟，佢地四個我唔知！」我好快咁答 






「無錯，你同佢一啲都唔熟，但你地五個做過嘅嘢，犯過嘅錯，就要負出代價！」個男人跳到俊龍身邊，就講 


「 .………… ，你咪响度裝神弄鬼，有咩就快啲講！」我大聲講 


「哈哈 …… 唔駛咁心急，個遊戲仲未完，係呢，你知唔知點解佢地四個要死，而你仲未死啊？問你都多餘，你用屎忽諗嘢緊係唔知啦，係因為佢地四個都抵死，我要佢地到死嗰刻都唔知咩事，哈哈哈 …… 而你？仲未係時候死住，因為你有個任務，咩任務，哈哈哈 …… 你好快就知！啊 ~ 係喎，有啲嘢唔記得比你睇！」 


個男人講完，就响褲袋攞咗部電話出嚟，㩒咗幾下，就拋比我，我接過一睇，係一段片，裡面影住嘅係 …… Mic …… hael 仔，背景好黑好暗，但我好肯定係 Michael，入面嘅佢雙手雙腳被捆綁，眼亦被紮實，坐响地下，口不停咁嗌 


「爸B、爸B …… 」