消失的五年: 《三十九》

太好喇 ~ Michael 仲未死！Michael 真係未死！！我好激動咁問 


「你究竟想點？我老婆呢？佢依家點啊？」 


「好想見佢地？登登登 …… 機會嚟喇，你記唔記得你手上面仲有兩條鎖匙，只要你搵啱地方，用到細嗰條匙，你自然知點做，但係個鎖喺邊？咁又要用下你個屎忽啦，不過，我估你諗到個仔死嗰刻都未諗到，哈哈 …… 求我吖，求我比提示你吖！」個男人叉住膘咁話 


「 ………… 我 …… 求下你 ……」我合埋眼，呼咗口氣就講






「就咁咋？比啲誠意吖，話晒求人，爸B、爸B，我好慘啊，哈哈哈哈 ……」個男人皺皺眉，就話 


為咗家怡同 Michael，我連命都可以唔要，區區少少嘅 …… 尊嚴，雙腳好唔情願咁彎曲，垂下頭，跪咗落地，望住地下講 


「我求下你 …… 」 






「哈哈哈哈哈哈 …… 乖乖，hand，hand …… 哈哈哈，好啦，好啦，見你咁聽話，就比個提示你，"一切嘅起點"，嗱，好好把握時間，我等得咋，有人唔等得㗎，你知啦，人唔食嘢會死㗎嘛，哈哈哈 … 」


個男人講完之後，轉身就行咗去開閘，然後施施然咁上番車，臨走嗰陣，笑笑口同我講


「同我好好看住部電話，等我知道你行蹤，你知啦，我心鬼擔心你，你唔好再咁曳，拋爛部電話喇，哈哈哈 …… 」






望住你嘅仇人大搖大擺咁離開，而你 …… 除咗目送之外，咩都做唔到，呢份侮辱，呢個仇 …… 我一定會記住！


音樂聲依舊，用塊布蓋住俊龍屍體後，我必須盡快離開呢度，條仆街黐起上嚟，報咗警就走唔切，我响枱上面攞咗幾件工具，就迅速逃離現場！


時間 : 03:07


夜深，一個响工業區度行好容易撞到警察，於是我急步行向開源道，上的士，同司機大佬講裕民坊，轉兩個彎，唔駛兩分鐘就落車，隨即行上麥記，買杯咖啡，就搵咗個角位坐低！


" 一切嘅起點 "






一坐低，腦海就出現呢五個字，咩係 "一切嘅起點"？唔通係 …… 我醒番嗰條隧道？但隧道又邊度有插鎖匙位！如果唔係隧道，起點？起點！咁 …… 最有可能嘅地方就係 ……


係喇，我地六個人都係讀同一間中學，所以成件事嘅起點就喺呢度 ……


天樂中學