消失的五年: 《三十七》

呢刻，我開始覺得有啲唔對路，就問一斌 


「做咩你突然間出手咁狠嘅，你 …… 係咪有咩瞞住我？」 


「阿東，我好清楚阿龍份人，你唔用啲武力，佢唔會講㗎！」一斌拍拍我膊頭，就話 


「點解你會咁講？你又話你地又唔係成日見，不如比我問清楚佢先好唔好？」我輕輕推開一斌隻手 






「哈，隨便你啦！」 


一斌轉身就行埋張枱度，我就將俊龍拉番起身，用力鍊佢肩斜肌，好快俊龍就有番少少知覺，我好緊張咁問 


「你唔想死嘅，就老實答我，究竟所有嘢係咁你做嘅？答我啊！」 






「東，嗚嗚 …… 我 …… 真 …… 係唔知你 …… 講乜啊 ……」俊龍邊喊邊講 


於是，我响袋度攞番本寫真集出嚟，隊响佢面前，就問 


「咁你實認得呢本嘢，係咪你嘅？講！」 






「呢本嘢 ………… 我 …… 有啲印象，但係唔 …… 係我㗎，係 …… 肥 …… 仔 …… 華㗎 …… 」俊龍用僅餘嘅力氣抬頭一望 


「你講咩話？呢本嘢係 …… 肥仔華嘅？無可能，一斌話係你㗎！」我雙手不停搖晃俊龍 


「一 …… 斌？范一 …… 斌？佢响 …… 邊？」俊龍好激動咁嗌 


我指一指枱前面帶住帽同口罩嘅一斌，同時，一斌亦慢慢行向俊龍身邊，當佢行到俊龍眼前，俊龍登大隻眼講 


「你究 …… 竟係 …… 邊邊個 …？」






「阿龍，我估唔到你做戲咁撚叻，你咪再扮嘢，你快啲講晒成件事出嚟，如果唔係，我放過你，阿東都唔放過你！」一斌笑笑口咁講 


「東，你 …… 咪聽佢 …… 講，呢個 …… 男人唔唔 …… 係一斌，一 …… 斌肥 …… 㗎！！！」俊龍哀求咁話 


「龍，到咗呢個時候仲玩嘢，我真係服撚咗你，你唔駛指意以為亂講就可以甩身，睇嚟你唔受下苦都唔講！」 


一斌講完就行咗去放工具張枱，攞起支鐵筆，再行番去俊龍身邊，見到咁樣，我即時衝去一斌前面，阻止佢有進一步行動，因為 …… 我已經分唔清，邊個講真，邊個講假 …… 


我用力揸實支鐵筆，然後同一斌講 






「斌，可唔可以等我攪清楚先再用武力啊！」 


「你信佢，唔信我！！」一斌大聲咁話 


「依家我邊個都唔信！！」我合埋眼講 


「阿東，我咁幫你，你竟然懷疑我？」一斌好激動咁講 


「我都好想信你，但 …… 你地兩個都有可疑嘅地方！」我心煩意亂咁話 






「咁你想點證明吖？」一斌望住我講 


「好，我問你地一條好簡單嘅問題，你地兩個中四、五同一班，一定識答呢條問題，當年你地班主任 Ms. Yeung 有咗，究竟佢生嘅係仔定女？」我望一望俊龍同一斌 


問完之後，我就行去俊龍身邊，彎彎腰，俊龍喺我耳邊講咗答案，我起身，就問 


「一斌，到你答！」 


一斌諗咗陣，跟住就話 






「咁多年前，我仲邊記得吖，好似係仔，唔係 …… 唔 …… 又好似係女，哎吔，我記得喇，雙胞胎先真，我啱唔啱？」 


佢一邊答，我已經慢慢移去枱嗰邊，攞起支棒球棍放响背後面，就講 


「當年你地個班主任根本就唔係 Ms.  Yeung，你條仆街究竟係邊個？」 


眼前呢個男人無答我，忽然，佢彎住腰，拍晒手， 


「哈哈哈哈哈哈哈哈哈哈 ……. 我屌你老母，忍得好辛苦啊！！」