消失的五年: 《二十五》

「嘭」一聲巨響！！！


一個個黃色氣球連隨升上半空，沉悶嘅夜空出現一片黃海，由於前面人群太多，我只係隱約見到有件物體從對面海港城上層跌咗落地下，突如其來嘅巨響，嚇到周圍啲人雞飛狗走，場面異常混亂，眼見啲人推嚟推去，爭相走避，唯獨我推開人群，反方向行去廣東道！


幾經辛苦先可以行近馬路，出現响眼前嘅原來係一個人形物體，點解咁講？只見佢手腳不正常咁扭曲，郁都唔郁咁攤咗响馬路中心，血漿四散！


望見咁嘅畫面，職業嘅本能反應，我下意識咁行埋去佢身邊，噗噗、噗噗 ，心跳不斷加速，呢種反應，並唔係因為驚而緊張，而係嚟自我嘅估計……






「唔好係佢，千祈唔好係佢吖 ……」


從衣著上嚟睇，眼前嘅應該係個男人，估計係由高處墜下，近距離望，啲腦漿已經爆頭外露，一時之間，根本分別唔到係邊個，但係 …… 我清楚睇到，扣响件西裝褸上面嘅名牌，Wilson Nam 藍 …… 志豪 ……


志豪？點解，點解會咁？






我知道，呢一刻已經唔係傷感嘅時間，過多陣，就會有大批警察趕到，所以我必須盡快離開，望到志豪部電話跌咗响佢腳附近，我第一時間攞起就跑入人群裡面！


跑跑跑，跑到彌敦道，我無理會架巴士編號，求其上咗一架，只希望離開尖沙咀範圍，上到上層，坐低，望望電話，


時間 : 20:22






嗄嗄嗄 …… 仆你個街，點解次次都快我一步，就當佢有能力知道我嘅行蹤，但根本無可能預計到我下一步做乜，唔通 ………… 佢真係將個追蹤偷聽器 ………… 植入咗我 …… 身體？！！


其實我有一刻諗過呢個可能性，不過，只係一瞬間，之後就無再諗，因為對我嚟講，呢個係一個好大膽嘅假設，但係 ………… 以現今嘅科技同條仆街嘅行為嚟睇，再加上消失咗五年，諗諗下，真係 …… 咩都有可能發生！