消失的五年: 《二十六》

如果我嘅假設係真，發展成依家咁嘅局面，某程度上都係我估計錯誤所做成，而志豪嘅死，我亦要負上好大責任 ……


望出窗外，雅蘭中心，㩒鐘落車，行落地鐵站，上咗荃灣線嘅列車，响銀包度攞出老表寫比我嘅地址，兩個站後，我就落車，行番上地面，眼前就係我要去嘅目的地 -- 高登電腦中心！


攞起手機，打咗個訊息比老表，好快就收到佢回覆，


"一切已經安排好，入到去搵個鬍鬚佬，同佢講「我要剪頭髮」，佢就知點做！"






時間 : 20:57


行樓梯上去，轉左，再轉右，抬頭一望，「Full Beard Computer Co. Ltd.」，係呢間喇，鋪頭入面無乜人，得兩個職員，一個高高瘦瘦嘅男仔，另一個坐响收銀位嘅中年男人，個男人帶住副圓形黑色眼鏡，滿面鬍鬚，咬住支煙，一睇就知佢 '好友善' 咁款，跟住我就行去佢面前，同佢講


「 我要剪頭髮 」






佢望一望我，就起身，做咗個跟住佢行嘅手勢，就行咗入去佢後面個倉度！


「啪」一聲，成個貨倉即時光猛晒，面積唔算好大，一個又一個紙皮箱疊到上天花，周圍仲放咗好多唔同嘅電腦用品，行到最入，有一張長枱，枱上面啲嘢亂不得了，有好多不之名嘅儀器，鬍鬚佬示意我坐响張櫈度，就同我講


「先生，洗頭，除咗件風褸先！」






我照佢嘅指示除低風褸，放埋一邊，望見個鬍鬚佬行嚟行去，左摷右摷，無幾耐，終於比佢搵到支類似乒乓波板嘅物睇，圓形部分中間空心，頂上面有棧燈，把手位就有啲制咁！


佢攞住支嘢，㩒住把手位粒紅色制，就示意我起身，我企定定郁都唔郁，見佢慢慢將支嘢由我正面開始掃一次，之後就到背面，忽然，响我背脊傳响一首歌，


"有人問我，我就會講，但是無人來 …………"


無錯，係陳奕迅嘅《浮誇》，鬍鬚佬拍一拍我，示意我除埋件 tee，


隔咗陣，又再聽到陳奕迅首《浮誇》， 佢就講






「先生，洗完頭，坐响度等等！」


「哦！」我就回答


鬍鬚佬行咗去張長枱度，放低支嘢，攞起支筆，响張紙度寫咗幾隻字，然後遞比我睇，


"個追蹤器放咗响你背脊！"