消失的五年: 《二十四》

電話又換過，衫褲又換埋，可以做嘅都做晒，依家咁嘅環境，唯有博一博，就算身上面真係有追蹤器，都無其他選擇， 於是我直接打比志豪，


「喂，邊位？」


「阿豪，係我吖，郭健東！」


「 阿東？………… 你 …… 搵我做乜？」志豪好驚訝咁話






「我估你都有睇今日報紙，所以我都唔轉彎抹角，今次搵你係有啲好緊要嘅嘢同你傾，關乎你嘅生命安危，你唔好收線，一定要聽埋我講！」我直接咁同佢講


「我都唔知你講乜，你唔好再搵我，一場朋友我唔想報警！」


「我知我講嘢你未必相信，但我 send 張相比你睇，睇完你再覆我！」






於是我就影咗張穿窿畢業相比佢睇，等咗幾分鐘，志豪都無回覆，就响我諗緊打比阿龍之際，電話就响起，一睇，係志豪，佢就話


「我打嚟唔代表我信你，見張相咁古怪，所以問下你發生咩事！」


我就將成件事由過隧道一刻至到收到張戲飛一事，講晒比佢聽，佢聽完之後無出聲，我亦都無再講嘢，大家都揸住個電話，隔咗陣，志豪就講






「黐撚線，邊有可能㗎，你估拍戲咩，死人啊，咪撚玩啦 ……」


講完就收咗線，我無再打比佢，一直揸住個電話，電話又再響起，一聽，我唔等對方開口，已經搶住講


「你打得嚟，即係相信我，你唔同我合作，你就死緊，你同我合作，起碼有一絲希望唔駛死，你自己諗！」有啲情況，你唔兇下對手唔得


「………… 我依家仲响 office，約你八點喺對面新港中心二樓 Pacific Coffee 等，到時再傾！」志豪諗咗一秒，就講


「好，不見不散！」






時間 : 19:48


其實由收線到依家，腦海不停咁諗，究竟家怡同 Michael 係咪真係已經 ………… ，郭健東，你唔可以信條仆街所講嘅嘢，只要一日未確實，一定要相信佢地仍然在生，呢一點係唔可以動搖！


喺尖沙咀 A1 出口行上嚟，轉右由海防道行去新港中心，唔知係咪好耐無出尖沙咀，平日夜晚都咁死多人，一條大直路都要左穿右插，行咗成七八分鐘先到新港，响我準備行入商場嗰刻，我比眼前嘅怪景象所吸引，望向對面馬路，一個又一個行人，由右向左，不論男女老幼，手上都揸住一個氣球，一個我好熟識嘅黃色哈哈笑氣球！


望見呢個情景，嗰種不祥嘅預感又再出現，就喺呢個時候，


「嘭」一聲巨響！！！