消失的五年: 《二十》

望住三個救護員迅速將個0靚仔穩固响抬床，再送上救護車，隨即開去醫院，旁邊嘅警察亦開始調查意外經過，向圍觀嘅群眾問資料，見到咁，我就從長樓梯急步離開！


右手緊緊揸實嗰本染血嘅校刊，內疚嘅心情一下子無法平伏， 無論咩原因都好，意外又好，人為都好，始終因我而起，雖然已經攞到本校刊，但 …… 最終傷害咗個無辜嘅學生，係我預計唔到！


落到商場，我即時走入洗手間，開著水龍頭，望住充滿血跡嘅洗手盤，腦海不斷浮現個0靚仔吐血嘅畫面，抬頭望，望住鏡入面嘅自己，郭健東啊！你係咪真係郭健東？


依家所發生嘅嘢，已經唔係我能夠預計同控制範圍，既然已經搵到本校刊，無論如何，都要盡快摷條仆街出嚟，還自己清白，一切一切就會改變，之後就可以見番家怡、Michael ……






關埋門，吸啖氣，慢慢揭開本校刊，望住目錄，大合照 …… 响 …… 四十八頁，四十八、四十 …… 八 …… 搵到喇，終於搵到張畢業大合照，我將張相同本校刊併埋一齊，除咗肥仔華，其餘嗰三個窿係 …… 


藍 …… 志豪、 談 …… 俊龍同 …… 范 …… 一 ……斌


5B班嘅藍志豪，5D班嘅談俊龍同范一斌，再加埋同我一班嘅聶振華，呢四個人究竟同我有咩關係？？






我記得中二、三嗰兩年，同志豪一班，佢份人比較口多，吹水能力特強，但打籃球好叻，畢業之後，我地都有聯絡，仲約埋一齊打波聚舊，佢間中都會打電話嚟介紹下啲保險，我一家三口啲保險都係佢負責。


至於談俊龍，淨係記得中一嗰年同過一班，之後就無試過，咁多年嚟都係小息嗰時，見到面就吹下水嗰種，唔算深交，畢業後，有年响旅行社撞到，先知佢做咗導遊，寒暄幾句，交換電話號碼，但都無聯絡過。


范一斌呀？如果無記錯，佢喺中四嗰年嚟嘅插班生，同阿龍一班，讀理科，而我就讀文科，所以可以話完全唔識嗰隻，印象中淨係記得佢帶眼鏡同瘦瘦地。






諗嚟諗去，我地除咗讀同一間中學，同一屆畢業之外，五個人根本無任何關係可言。不過，話晒都過咗咁多年，可能真係有啲嘢遺忘咗都未定，三個人之中，同藍志豪最熟，等我用少少時間組織下先再聯絡佢。


望望電話，


時間 : 16:44


~ 有個訊息，原來老表已經攪掂張卡，仲 send 咗段片比我，下載完，打開，我依家可以清清楚楚睇完段片，終於知道點解之前睇完，硬係覺得唔自然，同點解報紙隻字不提，原因係片中所發生嘅地點 唔 · 係 · 香 · 港！


由於個手機螢幕太細，我睇唔到被撞架車嘅車牌，於是我就發個訊息比表弟，問佢可唔可以放大車牌，再 send 幅相比我，佢回覆無問題。






隔咗陣，我收到張相，一睇，車牌係


“ ONTARIO AJAL 707 YOURS TO DISCOVER ”