消失的五年: 《二十一》

ONTARIO？？


上網一查，ONTARIO 中文譯名係安大略省，位於 …… 加拿大嘅 …… 東部 ……


咁 …… 即係呢段車禍片 …… 咪發生响 …… 加拿大 ……，加拿大？加拿大！！ 唔好啊！唔好啊！唔好啊！！！


家怡、Michael 你地唔好有事啊！！！！！






推開度門，離開洗手間，我好亂，亂到唔知點好，我應該行左，定行右，究竟可以去邊先可以搵到佢地，我依家應該點啊？啊 ~ 我可以點？我無理會交通燈，衝咗出馬路，行咗去對面嘅的士站！


我要打比家姐，家姐可能有方法聯絡到佢地，忽然，响我右手邊嗰個電話亭，傳嚟響聲 ……


鈴鈴、鈴鈴 ……






電話，有電話響，公眾電話亭嗰電話竟然響吖，我衝埋過去，然後攞起電話！


「喂，喂，你係邊個？快撚啲講嘢吖，你究竟係邊個啊！」


「 哈哈哈 ……」






「笑笑笑，笑乜撚嘢啊，仆街冚家剷，講啊，我老婆同個仔依家點吖？」聽見佢不停咁笑，我嬲到想殺咗佢


「 咁大個人，問人嘢要禮貌啲，唔駛我教呀！」電話嘅另一邊係一個男人


「仆 …… 你個街，講吖，我老婆同個仔點吖！」我無理會佢，再追問


「既然咁無誠意，咁我收線㗎喇 …… 」對方就話


「唔好吖！唔好吖！！請 …… 你講比我知，我老婆同個仔依家有無事吖 …… 」佢一收線，我就咩都唔知






「咁咪好囉，好似我屋企隻狗咁乖，hand 、hand，哈哈哈 ..... OKOK， 你想知比人撞嗰架車啲人點呀？唉 ………… 佢地呀？比多少少誠意先！」對方又再講


「………… 我 ..... 求下你，快啲講啦！」我無得揀，於是就話


「好好好，好啦，見你咁乖，即係咁，原本諗住同佢地玩下，細細地叫架拖頭同佢地打個招呼，點知佢架啲鋼水流成咁，你都有眼睇㗎啦，成架車入晒，變晒形，你有機會見到佢地，叫佢地下次 …… 唔係唔係，係下世先啱，叫佢地下世比多少少錢，買架好啲嘅，不過，我諗 …… 你都無機會見到佢地，哈哈哈 ………… 」對方好似當講笑咁講


「咩下世？咩無機會啊？你講乜啊？」我唔明白對方嘅說話


「吓？講到咁白都唔明？死晒喇，傻仔，哈哈哈 ……」對方一邊講，一邊笑






「你講咩啊？死晒？咩死晒啊？」我完全唔能夠接受佢所講嘅嘢


「哈哈 …… 咩死晒？你老婆同個仔都死哂啊，夠清楚未啊，係係係，仲有、仲有 ……」對方就再講


「仲有咩啊？」


「無，頭先呢，見你咁叻仔搵到本校刊，咪比個奬勵你，搵人用架私家車，一嘢撞落嗰0靚仔度囉，鍾唔鍾意？興唔興奮呀？」


「你 …… 你條仆街係咪黐撚線㗎？個0靚仔無辜㗎！我究竟同你有咩十冤九仇吖，點解要咁嚟害我啊？」我邊講，邊拍打個電話






「無辜？個0靚仔無辜？你老婆同個仔又無辜？咁比你地害嘅人係咪就應分啊？！吓！！！


噢！Sorry、 Sorry，我大聲咗少少，既然你有咁多問題，想知點解咪直接嚟問我囉，但係要快喎，你知啦，天災人禍嘅嘢，周時都有，一個唔小心，你要搵嘅人死咗，你一世都唔會知點解㗎喇！


咪住、咪住，嘩 ~ 乜成五點幾㗎嗱？我要睇放學ICU啊，遲啲再同你傾過，哈哈哈哈 …………」


「喂、喂、喂，你條狗種唔好收線啊！！！」我不停追問


可惜 …… 對方已經收咗線 …..