消失的五年: 《十九》

時間 : 14:15


係時間開始行動，我落番旺角地鐵站，行去觀塘線，上咗車之後，我就發咗個訊息比家姐報平安，收埋電話，我就再次攞出銀包，望住唯一一張嘅家庭照，自言自語，家怡、Michael 你地依家點呀？生活得好嗎？有冇掛住我啊？一個又一個無答案嘅問題，一段又一段嘅開心片段，一下子湧出嚟，雙眼不期然流下眼淚，心一酸，究竟我仲有冇機會再見番佢地 …… ？


「下一站觀塘 …… 」，不知不覺已經到咗觀塘，抹一抹眼角，收好銀包，我就落車，出閘。


數數手指，自從畢業後嗰兩三年，到依家都有十幾年無再踏足呢度 -- 翠屏邨，雖然附近多咗好多新嘅鋪頭，但當年放學例必幫襯嘅便利店，仍然喺度！






行上街市一樓，再直行，就係嗰條每日番學必定上落兩次嘅長樓梯，想當年一百幾十級，可以氣都唔喘，依家就 …… 


終於 …… 終於行 …… 到上嚟曉明街，面前 …… 呢間米綠色嘅中學，就係我嘅母校 -- 天樂中學！


呢一刻成事件嘅關鍵，就係相中嗰三個人，究竟點樣先可以搵到一張完整嘅畢業相？連最有可能搵到嘅學校網站都無，諗嚟諗去，淨低嘅只有一個地方 -- 母校！






如果我無估錯，學校嘅圖書館一定有歷年嚟嘅校刊，不過，以我依家嘅身份，根本無可能直接入去搵，偷偷地潛入去，亦有好大風險！


既然係咁，硬闖唔得，唯有智取！


時間 : 15:28






喺母校斜對面有一個足球場，我靜靜咁坐喺場邊等機會，放學鐘聲一響，陸陸續續有學生响大門行出嚟，其中一班學生正行緊過嚟球場呢邊！


十幾個學生喺球場上面追追逐逐，好令人懷念嘅畫面，睇咗一陣，機會終於嚟，响我前面有一個著住白飯魚嘅0靚仔，戇居居咁坐喺度，於是我就行過去，同佢講


「0靚仔，做咩唔同佢地一齊踢？」


「佢地話我著白飯魚唔比我踢喎 ……」個0靚仔無嚟神氣咁講


「著白飯魚唔係罪喎，想當年我讀天樂嗰陣，都係著白飯魚吱嘛！」我就望住佢咁話






「阿叔，乜你都係讀天樂㗎？」個0靚仔抬頭望一望


仆你個街，叫我阿叔 ……


「係啊！十九幾年前喇，我啱啱响加拿大番嚟，專登過嚟呢邊行下囉，咁多年無番嚟，附近都改變咗好多，以前呢度係石屎地，依家都變晒蠟青，0靚仔，見同你咁啱傾，又係學弟，嗱，呢度三百，夠你買對波 boot 㗎喇！」我响銀包攞咗三百蚊出嚟，遞咗比佢


「吓，我點可以收你啲錢㗎！」個0靚仔怕怕羞羞咁


「三幾百，就當我支持學弟囉！」我再將啲錢遞前少少






「咁 ……」個0靚仔仲猶疑緊


「如果你真係覺得唔好意思，咁啦！幫我一個好簡單嘅忙得唔得？」我輕輕拍一拍佢膊頭，就話


「有咩可以幫到你？」個0靚仔就問


「其實我好想睇番一九九五年本校刊，當年移民加拿大時唔見咗，裡面有好多相片同回憶，我咁多年無番嚟，識我嘅老師都可能退咗休，唔知你可唔可以幫我呢？」


「校刊？圖書館應該有，我去睇睇，你等我一陣！」佢講完之後，就跑番入學校。






求神拜佛，一定要搵到本校刊啊！！


十分鐘左右，見到個0靚仔好興奮咁行番出嚟，仲不停咁揮動手上本書，一本藍色嘅書，無錯喇，我記得當年本校刊係藍色㗎，終於比我搵到！


就响個0靚仔過馬路嗰一刻，我望見一架黑色私家車，由工業學院嗰邊以高速衝向個0靚仔度，事出突然，我連大嗌一聲小心都嚟切！


「砰」一下巨響，見到個0靚仔比架車撞到成個人彈開，郁都唔郁咁瞓响地，而架黑色私家車完全無停低過咁駛走咗。


救人要緊，我即時衝去個0靚仔身邊，望見個佢不停吐血，一時之間，我都唔知可以做得啲乜，向住圍觀啲學生大嗌






「快啲除兩個書包過嚟啦！！」


我慢慢將兩個書包放响佢個頭嘅兩邊，暫時固定條頸，然後喺佢耳邊講


「無事㗎，聽我講，千祈唔好郁！」


個0靚仔迷迷糊糊望住我，跟住笑笑口同我講


「叔 …… 叔，我攞到 …… 本 …… 校 …… 校刊喇 ……」


講完之後，佢就遞高本書，我伸手接過，就同佢講


「0靚仔，頂住吖，救護車嚟緊㗎喇！」


圍觀嘅人群越嚟越多，好快連學校嘅老師都走出埋嚟，呢個時間，我隱約聽到啲警號聲，即係代表警車同救護車好快就到，於是我慢慢起身，行番入人群堆裡面。