消失的五年: 《十四》

睇完段片，腦海仍然殘留嗰把好變態嘅笑聲，心裡面不禁寒一寒，諗番段片，顯示係三日前拍嘅，我估新聞唔多唔少都應該有報導！


上網摷番兩日前嘅蘋果同東方，但係 …… 好奇怪，又搵唔到呢單車禍嘅相關新聞，咁嚴重嘅意外無可能隻字不提，一定有啲嘢我留意唔到嘅！


再睇一次，感覺係有啲唔自然，可惜，段片太矇，連車牌都睇唔清楚，電腦白痴嘅我又唔識攪，搵個機會搵人幫手先得。


時間 : 02:39






呆呆望住天花板，無一樣嘢係順利㗎，由收工至依家，喺我角度嚟講，其實只不過係短短五個零鐘，但 ………… 有人話比你知原來已經過咗五年，係五年吖！


一下子發生咁多超乎想像嘅嘢，平凡嘅生活，突然有咁大反差，我真係面對唔到，連諗多一秒都唔想，究竟我做錯咗啲咩咁大件事，要攪到依家咁嘅田地吖 ！


我真係好想大嗌啊，仆街！！！






啊 ~ 我知道就算我點逃避，都要接受呢個事實，不過，你叫我點好吖，美好家庭，大好前途，一瞬間無晒，乜都無晒啊，既然你要迫死我吖嘛，好，我就做隻魔鬼，我會用盡所有方法去摷你出嚟，無論咩原因，我都要你死！！


呢刻我心入面只淨低一樣嘢 -「報仇」，攞起張紙，嘗試組織下成件事，一點一點咁寫落嚟，


一. 件事嘅起點喺通往天悦嗰條隧道，消失嘅五年，有咩原因同可能性，可以令一個人消失五年，會唔會同雙手上面啲傷痕有關？






二. 嗰張一九九五年嘅畢業相，相上面嗰四個人，會唔會係成件事嘅關鍵？


三. 我估計家怡同 Michael 去加拿大，亦唔係偶然嘅事，可能同嗰個自稱「老朋友」有關！


四. 究竟 …… 邊一個係 ......... 「老朋友」？


仲有嘅就 ………… 係 …………………………