消失的五年: 《十五》

「阿東，起身喇！」


「咩 …… 事，阿叔」


「做咩有床唔瞓啊？」阿叔拍拍我就問


時間 : 08:45






「哈哈 …… 睇片睇到瞓著咗都唔知添，啊 …… 橫掂醒咗，換衫飲茶囉，阿叔」我伸伸懶腰就話


「我一早換好衫啦，等你咋！」阿叔拉一拉自己件衫就講


刷完牙，洗埋面，問阿叔借咗頂帽，就落樓去合和中心飲茶！






阿叔十年前突然中風，當時四十幾歲，不幸中嘅大幸係右邊腦中風，即係無影響到說話能力，加上唔算好嚴重，經過物理治療，依家睇上嚟，雖然拐下拐下，但起碼叫做可以落街行下！


時間 : 09:03


我地由春園街上合和，途經七仔，我就叫阿叔等等，拉低少少頂帽就入咗去，望見門口位個報紙架，好幾份報紙嘅頭版都報導尋日爆炸、襲警嘅新聞，圖文並茂，我一早都預咗，連隨轉身行去收錢枱，要咗兩張電話卡，就離開！






上到三樓，再轉部"車立"就到酒樓，好耐都無試過兩叔姪飲茶，點咗幾籠點心，就傾下大家近況，我就老吹一下去加拿大學咗啲乜，阿叔就講下呢幾年嘅康復情況同生活！


時間 : 10:18


埋完單，準備離開之際，無意間比我睇到前面份報紙嘅內文，入面報導番五年前嗰單兇殺案，無錯，就係令我成為通緝犯嗰單！


望見死者張相，再睇埋佢個名，聶振華，個名咁熟嘅，喺邊度聽過呢？


唔 …… 啊！！肥仔 …… 華？