消失的五年: 《十三》

呢度係我地郭家嘅祖屋，屬於戰前樓，地方好大，有成四間房，阿爺阿嫲過咗身之後，就得番阿叔一個人住，每逢農曆初一，我地家族都會聚埋响呢度食團年飯，但其餘日子就較少上嚟。 


「點吖？呢幾年都唔見你上嚟，阿哥話你派咗去加拿大受訓，乜消防處咁好㗎咩？」阿叔就問 


聽阿叔嘅口吻，好似唔知我啲嘢咁，仲好唔駛搵藉口！ 


「係吖，番嚟香港無耐，咁啱同啲伙記响附近飲嘢，見咁夜，番到屋企都成兩點幾，咪諗住借宿一宵囉！」我是旦老吹咁答 






「呵 …… 無問題，不過下次記得打個電話上嚟先，等我準備定啲被鋪嘛！」阿叔打晒喊路咁講 


時間 : 00:28 


「呢度我熟到不得了，自己攪掂得喇，你瞓先啦，聽朝同你飲早茶呀！」我起身，慢慢推阿叔入房 






「咁你都唔好咁夜喇，我都有啲眼瞓，早抖！」阿叔轉身就話 


「早抖，阿叔！」 


對唔住，阿叔，講大話呃你，不過我都係身不由己 …… 






阿叔入咗房，我即時開著廳部電腦，同攞番個公文袋出嚟，望住果張有四個窿嘅畢業相，究竟呢四個人同呢件事有咩關係？


响電腦輸入校名「天樂中學」，就顯示出學校嘅網址，一click，畫面隨即出現一個熟悉嘅校徽，一段又一段嘅校園記憶呈現眼前，話咁快就已經十九幾年，進入相片集，睇咗好耐，逐頁逐頁搵，搵極都無二千年之前嘅畢業照，竟然連校網都無！ 


於是嘗試再打相關字眼，「1995年、畢業、一九九五、合照、相……」，亦都搵唔到，咁仲可以响邊度搵到呢張相？一定要盡快搵到呢四個人！ 


暫時將張相放埋一邊，攞出記憶卡，揸住呢張平平無奇嘅卡，我嗰種不祥嘅預感又再湧出嚟，插落轉換器，入面有段片，片長 32 秒，一開 


呢段片應該係由車頭攝影機所拍嘅，畫面質素好一般，正顯示緊架車响公路上面行緊，左下角日期 7/2/2014，時間係 17:32，開頭 10 秒完全無聲，忽然，有把男人聲講咗句 






「Yeah，the white one！」 


跟住架車好明顯咁加速，一嘢撞落前面架白色私家車度，「砰磅」一聲， 被撞嘅私家車失控咁撞落牆度，再反轉，撞人架車不單止無停低，隨之而嚟，竟然係笑聲，一連串嘅笑聲， 


「哈哈哈哈哈哈 ……」 


之後，畫面就完咗 .....