消失的五年: 《六》

我响天華路一直咁跑，好快就見到頌富商場，呢個商場分一期二期，商場與商場之間有條橋連接， 


時間係 21:12 


入到商場，我走去問個職員邊度有儲物櫃，佢一時間都答唔到我，佢查咗陣，就講比我聽一期二樓 239 號鋪大快活側邊有，我即時沿扶手電梯上一樓，行前再上二樓，轉左見到 206 號麥當勞，再行前就係 224 號海港酒樓，應該就到，一轉彎，前面就係 239 號大快活！ 


响大快活側邊有條路，入去就係洗手間，我沿路行，响轉彎位真係有一排藍灰色嘅儲物櫃，八大八小，分1 ~ 16 號。 






我逐格打開嚟睇，無嘅，呢個又無，無，無，無，又無，無嘅，無，無，無，無，無，無，無，淨低最後一排嗰兩個，一拉，鎖咗嘅，再拉，都係鎖咗，即係呢兩個其中一個係！ 


我嘗試想用力打開，但係呢類電子儲物櫃係無拉手位，一睇幅圖，顯示係要輸入六位數字密碼先會自動打開，我隨即攞出銀包，將入面所有嘅嘢都倒晒出嚟，逐樣搵，但係都唔見有任何數字，我再摷下啲衫袋褲袋，仍然無發現， 


時間 : 21:25 






仲淨番唔夠 5 分鐘，條仆街叫得我嚟，應該收埋响附近，於是我再搵清楚每格櫃，一定有嘅，我逐格逐格摸，無，無，無，無，無，無，咪住 ~ 响七號櫃入面個頂度，貼咗一張紙，我搣落嚟，上面寫住 


"141977" 


時間 : 21:29 






我立即輸入呢六個數字，「嚓」，右上角 15 號櫃就打開咗，入面有一個公文袋，我攞起一睇，正想打開之際


「嘭」一聲 


我成個人撞落後面幅牆，再彈落地，仆你個街，發生咩事，我搖搖頭，咳咳，就用手撑起身，拍一拍身上啲塵，望一望個儲物櫃，無咗門嘅16號櫃，入面炸到爛晒，好彩我有運避開，如果唔係唔死都重傷，個仆街究竟想點？ 


我將個公文袋放好，就諗住離開，但係爆炸好快驚動咗啲保安，佢地見我塊面流緊血，就好熱心咁扶住我，話警察同救護車好快到，聽到之後，我就更加要快啲離開！