消失的五年: 《五》

「細佬，家姐一直都信你無做過，但警方話兇器上面有你指紋，加上你又失蹤，所以警察一直咁搵你，你依家番嚟可以水落石出！」


「家姐，我依家真係好亂，妳唔好話比阿爸阿媽聽住， 我遲少少再聯絡妳！」我比一個又一個打擊，攪到我需要時間消化


「細佬 …… 」家姐好似仲有嘢未講完


我輕輕力將電話放回原位，無助咁坐咗响地，依家嘅我，彷彿被困响狹窄嘅電話亭一樣，究竟有邊個可以救番我出嚟？






我明明啱啱收工，趕番屋企同 Michael 慶祝生日，依家話我知我老婆同個仔移咗民，仲成為咗通緝犯，邊有可能，根本就係夢！


「磅、磅 ……」我個頭不停咁撞落個電話亭度


「醒吖，醒吖 ……」，好可惜，呢個唔係夢，無論我點撞點嗌，都唔會醒！






我伸手入褲袋，攞出銀包，望住入面張相，呢張溫馨嘅家庭照，一家三口，樂也融融，雙眼終於忍唔住流下眼淚，膝縮一角，不停飲泣，究竟點解會攪成咁？


一滴又一滴嘅淚水，滴落張相度，我好緊張咁用衫袖抹走啲淚水，無意中發現到，相片背後有兩行字，上面寫住


「係咪好掛住老婆同個仔呢？喂喂喂，機會嚟喇，快啲跑去頌富商場，嗰度有排儲物櫃，我响其中一格留低咗啲好嘢比你，但要快喎，過咗 21:30 神仙都幫唔到你！ 老朋友」






究竟係邊個？老朋友？玩咩把戲？又有一連串疑問出現 .....


我望望錶，


時間係 21:01


得番 29 分鐘，起身推門，就向頌富商場起勢咁跑，腦海不斷咁諗，究竟邊個同我有十冤九仇，點解要咁樣害我！


但係呢一刻最重要嘅，就係去頌富商場搵到個仆街留低嘅嘢，就算係陷阱，我都要去，因為呢個係依家唯一嘅線索！