消失的五年: 《二》

「啪」一聲


我慢慢張開雙眼，我喺邊啊，定一定神，發現自己瞓咗响條隧道嘅中間，周圍依然乜人都無，於是我起身一睇，無穿無爛，摸摸褲袋，銀包同電話都仲响度，望望錶，


時間 : 19:44


奇奇怪怪咁，見無任何損傷，就執番起份禮物，繼續行番屋企。






一路行，一路諗，究竟頭先發生咩事呢？感覺好似暈咗好耐好耐咁，仲發咗個好奇怪嘅夢，失驚無神暈一暈，搵日得閒都要搵個醫生檢查下，穩陣啲！


咪住先 ~


點解間惠康好似 …… 唔 …… 好似有啲唔同咗咁，望落去咁新淨、咁光猛嘅，幾時裝修㗎？






唔單只惠康唔同咗，連轉彎間診所都無啦啦執埋，我前兩日先睇完嚟，唔通係我心理作用，周圍環境有啲唔同咗咁。


咇、咇、咇、咇，唔得？ 咇、咇、咇、咇，又唔啱？有無攪錯吖！個外圍閘又改密碼，又唔早响，吹撚漲！


突然見到有人用銀包拍向密碼機下面，「嚓」，門就打開咗， 嘩 ~ 新裝㗎？






我都無理咁多，跟住入去，行到樓下大堂，就聽到有人問


「先生，請問你搵咩單位？」坐頭保安向我問


「我？我住十七樓A，點解唔見張伯嘅？今日休息呀？」我望一望呢位保安，就話


「張伯？前排退咗休啦！」坐頭保安就答


「吓！我好似尋晚先見完佢咋喎，哈，可能我睇錯啦，係呢，你點稱呼啊？」我摸一摸後腦，就問






「叫我陳仔，先生，你有啲熟好熟面，唔知响邊度見過咁 ……」陳仔打亮一下，就話


傾咗兩句，我就入，㩒十七樓，响入面，我忽然有種唔好嘅預感，但又講唔出係咩 ……


門一大開，前面係一面鏡，我望住鏡入面嘅自己，感覺有啲陌生，好似唔認識眼前嘅自己一樣。


行到門口，插入鎖匙，嘗試咗幾次都開唔到，唯有㩒鐘，「叮噹」，等咗陣，門徐徐打開，露出咗一隻眼，一隻我從未見過嘅眼睛，對方係個男人，呢個男人一直望住我，跟住講咗句好莫名其妙嘅說話


「先生，你搵邊位啊？」