消失的五年: 《三》

「搵邊位？你邊位就真啊！」比對方咁問，我真係有啲嬲嬲地咁答

「先生，你响人地門口問屋主邊位？有無過份咗啲吖？」嗰男人亦唔係善男信女，反問一句


「你係咪夾埋我老婆嚟玩我？Michael 呢？快啲叫佢地出嚟 ……」我開始有啲心急，於是就話


「嗱，你同我聽清楚，呢度無 Michael 同你老婆，你唔好再响度攪事，我叫保安㗎！」嗰男人一面正經咁講






「嘭」一聲關埋度門，我發呆咁企咗响門前，腦海十分混亂，完全唔明白發生緊咩事，我屋企入面有個三唔識七嘅男人响度，仲問我邊位，黐撚線㗎，玩都有個譜吖！


我再次㩒鐘，又係嗰個男人開門，今次我忍唔住爆粗


「你條仆街，好快啲叫我老婆同個仔出嚟喇，唔好玩到咁撚大吖！」






「你都黐筋㗎，邊撚個同你玩啊！」嗰男人亦用粗口回應


突然，有把女人聲


「咩事吖，老公？」


我一睇，呢個女人係邊個啊？點解我屋企又多咗個陌生女人响度㗎？






「請問 …… 呢度係咪一座十七A？」腦海完全組織唔嚟，我就問


「係啊！你係咪搵錯咗呀？」嗰位女士就答


「老婆唔好理佢！」


嗰男人講完之後，「嘭」一聲，再次關埋度門，我簡直無法相信呢個事實，我屋企變咗唔係我屋企？邊有可能發生啲咁荒謬嘅事！


難以置信嘅事情，呈現眼前，我好似儍咗咁，不停㩒個制，「叮」一聲，門打開，入到，無晒意識咁，不停㩒個 "G“ 字，






啪啪啪啪 …… 啪啪啪啪 …… 啪啪啪啪 …… 啪啪啪啪 ……


直至度門打開，我無理會眼前嘅所有事物，一口氣衝出門口，一睇，


「第一座」


嗄嗄嗄嗄 …… 有無人可以話比我知，究竟發生咗咩事，點解咁不可思議，我係咪發緊夢！


我坐咗响後園張櫈上，用力拍一拍塊面，然後同自己講






「郭健東，你要冷靜，平時你做跳樓、腐屍都唔驚，呢一刻，一定要冷靜！」


跟住我攞出電話，打比老婆，啲、啲、啲、啲 …… 做咩無訊號㗎？我個個月準時交錢，住嘉湖用和記，咁都收唔到？有冇攪撚錯啊！


就响我發勞騷之際，我望到一樣好匪夷所思嘅嘢，嚇到我跌咗部電話落地，「啪」，我彎低腰執番起部電話，一睇，螢光幕裂咗，但係我仍然可以清楚睇到顯示嘅日期
……


"2014年2月10日"