消失的五年: 《一》

日期 : 2009年2月10日


時間 : 19:30


「阿東，放工約咗阿謙同龍仔打邊爐，有無性趣？」林輝拍一拍我，就問


「哈哈，性趣就緊係有啦，但係今日個仔嘅生日，收工趕住番屋企同佢慶祝，下次先啦！」我轉身同林輝講






「咁無計啦，好爸爸，今次放過你，咁下次再食啦，幫我同 Michael 仔講聲生日快樂！」林輝就話


「有心喇，輝叔，聽日見！」我一邊答，一邊行出救護站


「聽日見！」






我叫郭健東，今年三十二歲，職業係救護員，响天水圍番工，呢份工日日都面對生老病死，十八歲入行到依家，眨下眼就十幾年，個人都化化地，我地食無定時，收工就例必收遲，所以我地番工果日都盡量唔約人。


今日好好彩，難得可以準時收工，沖完涼，換好衫，就趕番屋企同寶貝仔慶祝生日。


講開個百厭星，成日對我陏手陏腳，話自己係超人，打我呢隻爸B怪喎，對超人迷到不得了，見佢就嚟生日，一早買定個超人玩具，放咗响局，諗住比個驚喜佢。






我習慣番工放工都係行路，一嚟健康，二嚟慳錢，你估養個細路咁易㗎，放咗工，沿俊宏軒外圍，途經慧景軒，過隧道就到天悦輕鐵站，行過對面天情邨，再直行，响美心再過馬路，就番到屋企，全程大概二十分鐘，風雨不改。


今晚一如以往咁行番屋企，响俊宏軒到天悦輕鐵呢段路，每日撞口撞面都會見到啲居民放狗、散步，好鬼溫馨，Michael 仔成日話想養隻狗，我同老婆商量過，如果佢下年考到入心儀小學，就買隻獎勵佢，哈哈。


不經不覺，已經行到隧道口，即係行咗一半路，望住手上面盒玩具，唔知阿仔見到呢個超人玩具，會有咩反應呢？


唔知點解，今晚條隧道靜嚶嚶咁，人影都無過，我慢慢落斜，行到中間較平位置，就响我準備上番斜之際，突然聽到有人嗌我


「郭 · 健 · 東」






我回頭一望，眼前一黑，跟住就 ……