靈魂轉移師 Law of closure: (2)

(2)
話音未落，一位身形瘦削，著住深綠色連身短裙既女子推開藍葉既玻璃門，掛係藍葉門口既風鈴發出清脆既聲音。佢一踏進門口就四處張望，應該係林小姐，我舉手向佢示意。
「林小姐，你好。我係顧嵐，依位係我師父，顧一安，但今日係會由我負責你既case。要唔要叫杯野杯先？」
「唔駛啦，可以開始。」
「好既，咁我地今日出黎係詳細講解一次咩係靈魂轉移，個過程係點，同埋當中會有咩風險，了解之後林小姐先決定做唔做」
「明白。」
 
林小姐既眼神堅定得令到我更緊張，同佢對話既短短時間，佢眼光未移開過我既眼睛，全程都好用力咁盯住我。一般人對於靈轉都係零認識，所以每每第一次見面都係戰戰競競，唔難係佢地眼神中見到佢地既恐懼同對未知既不安。可是，林小姐既堅定眼神唔係黎自佢對於靈轉既信心，而係佢無論如何都想活下去既堅持。
 
「係我地靈轉既角度，一個完整既人要有靈魂、軀殼同記憶，而靈魂同記憶係分開，靈魂其實係一個實體，就好似大眾所流傳一樣，人死前同死後既差別就係靈魂既重量。相反，記憶只係一組意念，要輸入先會存在係靈魂裡面，但一旦靈魂脫離身軀殼，記憶就會自動歸零。簡單黎講，軀殼就好似一部電腦，靈魂就好似一個遊戲程式，記憶就係儲存係遊戲程式裡面既遊戲進度。如果一開始將遊戲程度安裝係電腦A, 遊戲進度只係存在係電腦A 既遊戲程式裡面。如果將遊戲程式重新安裝在電腦B 裡面，所有遊戲進度會消失，要重新寫入。我地靈移師既工作除左將靈魂由一個軀殼轉移到另一個軀殼外，仲要將原有既記憶寫入新既軀殼裡面。所以係進行靈轉之前，我地需要一份你既記憶副本。」




「記憶副本？」
「 記憶副本最簡單就係日記，訊息既對話紀錄，Facebook status，一切有記錄你思想同行為既文字或語音檔案，越多越好。但可惜係靈轉既技術都係只限於寫入依兩種檔案，所以任何影像同相都無用，除非你可以將佢地轉化為文字。記憶副本可以話係靈轉中最重要既元素，記憶係用黎define一個人既工具，你既性格、你既行為、你既思想都係基於你既記憶。如果無左記憶副本，靈轉後既你就唔係再係你。」
「如果⋯⋯我⋯⋯無⋯⋯寫⋯⋯日記既習慣呢？」
 
林小姐既眼神頓時失色，面色慘白，手足無措，好似係被困係沙漠裡面，以為發現水源，非常雀躍，點知只係海巿辱樓，突然跌進無助既深淵。見到林小姐咁我先發覺自己講解既失誤，因為每個人黎搵靈轉師既客人都係走到人生既掘頭路，走到絕望，失去左理智同常識，所以先會相信我地靈轉師既存在，相信依種係常人眼中如此荒謬既職業可以比到佢地命應該絕既人生既一絲希望。可想而知，佢地既心靈係如此既脆弱，只要我地稍不留神，少少既口誤都會立刻奪去佢地既最後一點光，再次將佢地推向黑洞。呀叔狠狠咁瞪住我示意要立刻糾正口誤。
 
「先前我講個d日記等等都係記憶副本既例子，我地都知道唔係個個人都會有寫日記習慣，就算有都未必夠完整，因為我地寫日記，只會記低我地想記得既事，但記憶唔只係一面倒我地願意記憶既野，有時候對我地影響最深遠既往往係我地最唔想記起同忽略左唔起眼既細節。所以為左安全起見，每一位同意做靈轉既客人都要接受一個詳細既訪問，以便我地編寫你地每一個人既記憶副本。」
聽完我既解釋之後，林小姐既雙眸終於回復少少神彩，我先鬆一口氣。
「最後，係林小姐考慮做唔做靈轉之前，我地有負責任比你知道， 因為靈轉既一d限制，係靈轉之後會有個適應期，即係靈魂、記憶副本同新既軀殻既磨合期。係適應期既時候，你可能會對自己有種陌生感，有機會會排斥新軀殻，因為係記憶副本裡面我地會記錄埋你做靈移，所以導致依種負作用，但如果你係過渡期有忍受唔到既陌生感，你可以黎搵我地，我地可以幫你刪除靈移依段記憶，咁樣陌生感就會消除，靈魂同肉體之間就唔會互相排斥。當然亦有客人從一開始就選擇放棄靈轉既記憶，但依個決定係要視乎靈轉既原因同之後既計劃。」
「我⋯⋯」




 
林小姐進入沈思，藍葉既唱片機原來播梗陳奕迅既我的快樂時代⋯⋯
讓我對這世界好奇
讓我信自己的真理
讓我有個永遠假期
讓我渴睡也可嬉戲
 
唔係話要鼓吹自殺，但其實係依家依個世代活著有咩意義呢，唔係，應該有咩誘因令到人有活下去既欲望呢？幼稚園已經要贏在起跑線，開始學十八般武藝；到左小學又要操TSA，繼續學十八般武藝加補習； 捱到中學，岩岩開始對唔知學黎做咩既十八般武藝日久生情啦，又要為左爭大學學位而放棄集中火力備戰公開試。好啦，終於升上大學，以為可以抖下啦，又要搵intern整靚張cv將來搵工。出到社會，又有另一套遊戲規則要跟，玩鬥快買樓同結婚生仔。即係呢，如果投胎轉世會好似報名參加旅行團呢，我肯定會同孟婆講
「孟婆，大家去旅行都係求開心姐，依個團咁chur，去黎做咩，唔呀，我唔去呀。」
「抵玩囉，咁耐以黎邊有團可以去咁耐，又可以做咁多野呀。 」




我諗投胎個時真係鬼迷心竅比呀孟婆sell到我去依個團，我又唔會話中途退團唔玩既，既然都比左團費落就睇下可以有幾差囉，但我又唔會好似林小姐咁癲，都就黎捱完個旅行團啦，你竟然話要encore?!
 
過左幾秒後，我打斷林小姐既沈思。
「唔駛急住今日決定，今日出黎見面都係希望比林小姐好好了解下靈轉姐。最後，肉體方面就簡單得多，我地會用空人，即靈魂已經脫離軀殻既植物人，醫院裡有一個隱藏部門係專門放置一d無親屬或者親屬已經簽字放棄照理既植物人，因為現時安樂死仲未立法再加上人道理由，醫院都一定要用最基本既醫療設備維持佢地既生命直到佢地停止心跳同呼吸為止。我地會選一個同你外形差唔多既空人，然後交比相熟既整容醫生將你既容貌百分百複製落空人到，但放心其實世界上同我地相似既人比比皆是，人都係自以為特別既生物，我地人類查實同其他動物一樣同同類都係如此既相似，只係因為我地覺得自己既食物鏈中最頂層，認定自己係主角，所以先會附於自己獨特性，但可能係貓貓狗狗眼中， 我地人類都係一樣⋯⋯」
呀叔清一清喉嚨，提醒我已經離左題。
「唔好意思，我既講解都差唔多啦，唔知林小姐有無咩問題？」
「唔，顧小姐你講解得好清楚，但我想問下如果決定做最快可以幾時做同埋之後會點？」
「通常我地會比客人兩個星期冷靜期考慮，如果之後決定做就要先比二萬五做按金，跟住就會同你約時間做記憶副本，再之後我同師父大約要準備一個月左右，準備好會通知你再約時間做靈轉，做之前要比埋尾數五萬元，然後靈轉過程約兩個星期。睇返師父既行程，最快可以一個月後先有空檔。」
「咁兩星期之後... 我打比你？」
「唔駛擔心，我會打比你問。仲有無其他問題或者唔清楚既事？」
「無啦，唔該」
「咁兩個星期後我再聯絡你。」
 
係林小姐離開藍葉後呀叔即刻端起一個嚴肅師父樣，一個我跟佢兩年都無見過既樣，比我知道我頭先一定犯下大錯。我開始心虛唔敢直望呀叔。