靈魂轉移師 Law of closure: (1)

靈魂轉移師係我屋企既家族生意，我已經係顧家靈轉師第23代傳人。雖然係家族生意，但唔係話只要係姓顧就一定可以做，祖先為左保證顧家靈轉術既質素，每個顧家子孫係正式成為一位靈魂轉移師之前都要實習2年，之後要係師父既監督下獨立完成5個case當最後考試，考試合格先可以成為一個靈魂轉移師，相反如果失敗，就證明自己無天分，只可以做一個普通既顧家子孫。我宜家仲係實習生，岩岩完成2年實習，今日準備同師父一起去接我第一考試case。
 
所謂好既開始已經係成功既一半，所以我特登提早半個鐘到約定「藍葉cafe」等，整頓既興奮又緊張既情緒。藍葉係我平日好鍾意留連既地方，但其實依度無論食物同飲品都好一般，亦因為咁再加上無搞咩＃隱世小店＃紫薯＃邪惡芝士＃文青必到＃少女心大爆發既噱頭宣傳，所以無論咩日子咩時間黎都無咩人，好靜，只會聽到場內播既80、90年代既粵語流行曲。係依方面，我好欣賞老闆唔隨波逐流既堅持，但其實老闆脾氣生人勿近般差，員工流失率極高，平均做一星期就會頂唔順辭職，以我所知，做得最長既都係捱唔過一個月，所以就算我日日就算係度打躉比伙記認到，都唔駛擔心長遠要同佢打交道。好多時黎café就係想出黎自己一個靜下，唔想遇到任何識得自己既人，亦唔想應酬佢地既寒喧問暖，我需要一d只係屬於自己既時間同空間。好彩老闆成日係廚房，所以只要避開開鋪同關鋪時間，基本上藍葉就係我避世既地方。
 
「呀叔，你係邊呀？我已經到左藍葉啦。」
「五分鐘後到，唔駛怕wo，客人好少準時到。我今朝4點先瞓，麻煩幫我叫定杯espresso，唔該顧嵐，我最愛既徒弟，錫晒你。」
 
呀叔就係我既靈轉師父，但佢一d師父架子都無， 座右銘係：「人生苦短，要及時行樂」，所以跟住佢實習一d都唔辛苦，每日跟佢只係接見2、3 個case，剩餘時間都係我自己做準備，而佢就繼續佢既遊戲人間。雖然佢今年已經49歲，但完全無人向中年既迹象，身形無發福，頭髮依然烏黑濃密。佢眼睛長而細，好似荷蘭豆，單眼皮，但烱烱有神，配合高廷既鼻同細薄既嘴，的確好眉清目秀，有足夠條件比佢繼續做佢既花花公子，每個月換一個女朋友。呀叔無講大話，五分鐘後真係出現係藍葉，今日既佢無gel到頭，只著左一件白色無print t-shirt 同薄荷綠色四腳骨牛仔褲，依身隨意既打扮令本身保養得宜既佢更後生，坐埋我身邊，相信其他人會誤以為佢係我男朋友多過係我老豆。
 
「依度d 咖啡真係保持到佢一路難飲既水準。」




「難飲你又叫我幫你叫」
「我飲咖啡，唔係因為我鍾意，而係我需要。唔好講依樣住，今日約左既林小姐個背景係點？」
「34歲，小學老師，今日係想了解下靈轉。」
「好，咁依個係你第一個考試case，我只會坐係到聽架姐，唔會幫你手架，記住我地唔係社工，唔係心理學家， 唔會輔導client。」