靈魂轉移師 Law of closure: (3)
「顧嵐，我係見case之前提醒過你d咩？」
「我地唔可以輔導客人，但我無呀...應該.....無......我有咩？」
「記唔記得頭先林小姐比你到口啞啞呀？我地係唔會係第一咨詢問客人做靈轉既原因同之後既計劃，除非個客主動同我地講。依個係一個好大既錯誤，就等如心臟科醫生唔會問病人點解會做搭橋手術，之後有咩計劃。你想得到d 咩答案？如果你比人問你為左咩要長命d，你會有咩感覺？客人黎搵我地就因為佢地有需要，背後既原因同佢地之後既計劃我地唔需要了解。」
「咁關於靈轉記憶個度點算？」
「如果林小姐之後回覆話要做靈轉，係做記憶副本個日既自自然然會講。同埋要刪除靈轉記憶既要求多數都係等客人提出，如果佢地唔提出，我地就唔好問。我唔想好似你咁間接刺激佢地諗點解要繼續活著，活著又可以點。想活下去只係人面對死亡既自然反射，無解釋。你跟左我唔只兩年啦，睇過咁多個cases 都應該知。顧嵐，你做多5個case就要成為一個獨當一面既靈轉師架啦，要時時刻刻提醒自己唔好過分注重細節。」
呀叔雖然成日一副玩世不恭既樣，但需要認真既時候，就會即係收起，應該話係揭開佢花花公子既面具，回復返嚴肅既師父樣。因為我一直以黎表現都算唔錯，幾乎都無見過面具下既呀叔。
記得，我岩岩正式拜完呀叔為師，成為靈轉實習生，呀順既反應係：「估唔到依個花花公子都會收徒弟，但小心比佢教壞，做唔成靈轉師。佢成世人除左話要做靈轉師個刻認真之外，成日都玩玩下。」但經過今日，我知道呀叔內心既好關心我依個徒弟，而佢都係一個好師父。
「呀叔，程朗話佢寫陳俊皓既記憶副本時遇到d問題，叫我地下晝去佢屋企搵佢。」
「你個朗朗真係麻煩，想見你就見你啦，成日都搵公事做藉口，以前我做報社總編既時候，我帶住佢入行，由咩都唔識教到佢青出於藍，全行都知佢枝筆最勁架啦，有咩會寫唔到呀。呀叔我好通氣既，唔做電燈膽，唔阻住你地拍拖，培養感情。」
「呀叔，你亂講d 咩呀！幾時同你講我鍾意佢，同佢拍拖？佢就想！」
呀叔佢笑而不語，明顯係睇穿左我既少女心事，我感覺到我雙顩宜家應該又紅又燙，有時候，我真係希望呀叔可以正經d， 唔好每次都拆穿依個蠢材程朗既一舉一動同睇穿我既心思，都唔明點解，明明程朗由大學時期已經開始跟住呀叔，由美國跟到香港，跟左咁耐一d才子風流都學唔到？仲一舊正經木頭，枉佢係呀叔最得意既徒弟。
最後係我既堅持下，我同呀叔簡單食完個晏後就立刻起程去程朗屋企。程朗屋企係近上環海皮既唐樓，佢既屋企人係香港回歸之前已經移民左去好多華人聚集既溫哥華，宜家得返佢一個人係香港。呀叔係七年前辭去總編一職轉為做靈轉師，跟住一年後，程朗都辭職轉做全職自由工作者，幫幾份報紙寫下專欄，同埋幫我地寫記憶副本。因為自己一個住，為左方便，佢索性將屋企裝修為工作室加屋企，前鋪後居，名正言順可以足不出戶做一個工作狂。平時要做記憶副本既時候，我地都會直接帶客人到佢既工作室到做訪問。
「程朗，知你肯定未食晏，買左外賣比你，四寶飯，凍檸茶走甜走冰。」
「唔該顧嵐，成朝掛住陳俊皓個case都唔記得左未食野。師父，你都黎左呀。」程朗驚訝咁講。
「我老人家原本唔想黎架，費事阻住你班後生啦，但呀嵐堅持拉我黎架，話唔黎就師徒親戚都無得做。傻妹拉住我做咩姐，我既意思係你遲下都要自立門戶架啦，唔可以下下靠我依個老野既。你諗左去邊呀？」呀叔一邊講，我就一邊狠狠咁盯住佢。
呀叔玩我玩得不亦樂乎，程朗佢應該餓到肚皮貼背脊，好專心咁狼吞虎嚥個飯盒無理會到我地兩師徒既對話。我開始興幸程朗係個種只能夠一心一意做一件事既人。我行到程朗既工作枱前，電腦螢幕只顯示住 一個錄音檔同一個文字檔，文字檔除左改左文件名做陳俊皓之外，空白一片，但枱面上佈滿凌亂既陳俊皓既訪問筆錄。
「又話忙左成朝既，一隻字都未打。少何喎⋯⋯你都會偷懶。但星期日要架啦。」
程朗岩岩食完最後一啖飯，一邊飲住檸檬茶一邊行過黎工作枱前，佢無行去我身旁較鬆動既位而選擇停左係我背後。我同佢之間距離好近，可以聞到佢身上既檸檬茶味，酸中帶淡淡甜味。我全身變得好僵硬，但又唔敢移開，如果宜家拎轉身我既額頭應該會掂到佢下巴稀疏既鬚根，內心好好奇究竟會係點既觸感。係我考慮擰唔擰轉身之際，程朗已經行開左，坐返上佢既大班椅到，轉向師父同我既方向。
「唔係呀，我成朝反覆聽個日既錄音同睇筆錄好多次，都覺得陳俊皓既記憶好怪，雖然童年到中學既記憶都好正常，但當佢一講到佢父母離婚之後既人生就比到我一種好唔協調既感覺，同埋佢成個訪問既用詞都好怪，粗俗得黎又好努力咁嘗試文雅 。仲有，正常人既記憶應該係越近既越清楚，越遠既越朦糊架嘛，但佢既記憶自父母離異依個時間點之後就好似無左時間造成既差別，無論幾耐之前同幾近期既記憶都無分別，一樣咁清楚。」
「個日做訪問既時候，我都有咁既感覺。我有諗過陳俊皓係唔係有寫日記既習慣，但如果有就應該會交比我地做參考，唔駛咁麻煩背晒自己日記呀⋯⋯師父你覺得呢？」
「我覺得佢係想『重生』。」師父冷靜咁回答，意思係其實佢一早就知客人既意圖，但點解佢唔同我地講呢？