【短短一個月內，屋企就死左五個人...】: 第二十六章 解毒

「哦?你地家族唔同既人會負責唔同既支流? 」以我所知，法家分成山醫卜命相五個支流，每條支流皆各有精英，各師其職。唔難相像丫，道法本就博大精深，要一個人學哂真係無可能，傳說中只有上古蚩尤係精通各術，不過充其量都只係其初型。道法後期經過不同奇人既研究改良，每條支流都可以變成單一學派。按葬經所記載，單係晉朝，成型有效既符咒已經上達五百七十七，仲未計山術中，同符咒享有同等地位既手印，罡步等，可想言之道法既威力係幾咁強大。 不過我好奇既就係，點解一個經營趕屍客棧既家族竟然都要分部分支?

「哈哈，無錯。但係我地無道家分得咁仔細，我地只有分開生死醫滅四家。生，係指向外，接待生人，生意上既來往，都係由我黎搞。死，聽個名都知係幫死人辨事，多數為趕屍匠引路，搵一個適合既地方黎經營趕屍客棧等等既，呢個係我大哥既本行。 醫，我家姐既本行，為族中既清屍毒，醫下一般感冒等，你知啦，我地以前住係啲極偏僻既地方，生人一般都唔敢入黎，連醫生都唔敢入啦。滅，最重要既一環。當趕屍匠既屍失控，極有可能禍害人間，令生靈塗炭時，滅家就會出手，當年我細佬係剿殭時重傷而死…」 風山秋如數家珍，滔滔不絕地講起佢家族啲威水史。可能平時無咩人同佢傾計，我發覺佢一開口就開始講過不停，甚至連阿牛帶左佢家姐去檢查張天師既傷勢都唔知，愈講就愈起勁。 「你唔好睇我地好似只係營運一間客棧呀，其實我地以前係湘西其他地方仲有分店架…例如:.. 」

「秋!」風月夏低聲喝左一句，將風山秋從回憶中拉返出黎。雖然風月夏年紀早已年過七十，但係中氣依然十足，係咪修道既人個個身體都咁好?我係都應該考慮下修道? 風山秋即時打住話柄，面色微變。兀然站起，打左自己腦袋一下，邊推住風月夏邊講:「仆街啦掛住講!講到連張兄中左毒都唔記得! 」 風月夏瞪左風山秋一下，推開左佢隻手。「唔使推啦，我解左佢身體入邊啲毒啦。」 一旁既我立即鬆左一口氣，風山秋亦如此。 「但係你地頭先到底做過咩黎?點解會招惹到紫殭呢種窮凶極惡既殭? 」