【短短一個月內，屋企就死左五個人...】: 第二十七章 紫殭

「殭分九等，不化遊伏毛白綠紫魃飛。」 -- 葬經陰卷屍章 「係阿冬…阿冬佢返左黎…」風山秋得知自己細佬不單止化殭，仲要化成紫殭，大吃一驚，說話都變得有啲唔索利，佢既反應甚至嚇到一旁既風月夏面都青埋。睇黎葬經中所記載既果然不假，殭屍中以飛魃為最厲害，紫殭為第三等，甚至連經營趕屍客棧多年既風山秋都被嚇怕。

一旁既阿牛根本唔識分咁多種殭屍有咩分別，當然唔會知紫殭有何等既威力，故此開口問道: 「風伯伯你會唔會誇張左啲呀?不過係條識追人既死屍咋嘛，你唔好去招惹佢咪得囉，呢到同頭先個墳場又距離咁遠，佢跳飛機咁跳都要幾年先黎到啦!」 「錯啦後生仔…」風月夏呷過由風華鈴所遞上既茶，變得鎮定返啲: 「殭屍分成九等，每等皆有不同既能力，傳聞紫殭可以遁地，日行百里…而又根據我地風家多年既經驗…化殭既屍會追溯返最後一個接觸佢既活人復仇…」 風月夏一路講，風山秋既面色變得更差。睇黎佢就係最後一個接觸到風海冬既活人。 風山秋突然嚯一聲企左起身，幾乎撞翻梳化前既小茶几，口中唸唸有詞，一仆一碌咁衝左入祠堂後邊唔知搞咩。 「算啦老三，我地死又大半世，唔死又大半世咯，何必對死咁執著呢…」風月夏搖搖頭，嘆道。「咦，係喎，點解你地會同我老三一齊既，你地係…?」 丫係!屌一路上發生左太多事，搞到我幾乎都忘卻左原先此行既目的!我連忙報上姓名，連帶爺爺佢地既事，後續既行程都一一詳細講述。

「嗯…張委託的確有我細佬既簽名，但係佢都死左咁多年啦，死人仲點簽名?嗯…唔通…」風月夏本身愁眉深鎖，百思不得其解，卻忽然雙眼放光。 「我都只係估架咋，幾廿歲人腦筋唔太靈活啦…我覺得我細佬係呢一兩個月先死既! 」