【短短一個月內，屋企就死左五個人...】: 第二十五章 風家村

「風伯伯話狐鬼將自己魂附左入蜈蚣身體之中，當啲蜈蚣開始死，狐鬼既法力自然就開始減少。嗯，咪就係咁囉。」阿牛輕描淡寫地作結，彷彿頭先經歷既一切都不足為懼。咁又係，佢又無穿無爛。 之後既車程大家都唔再出聲，只有間唔中風山秋替阿牛指下路。 直到天光既時候，我地終於黎到一條村到，村口有個木坊寫住風家村。 由風山秋引路之下，阿牛揹起已經陷入昏迷既張天師，我地好快就入到村。 村口既木屋群早已破破落落，有幾間甚至連簷篷都掀起左一半。然而，風家村比起一般既村落規模大上一倍，不少既屋係以磚或者花崗石黎建成，雖然依家既風家村了無人氣，但係亦不難令人聯想其曾經輝煌既時代。 風山秋帶住我地左穿右插，穿住一列又列既空屋後，赫然一幢以紅磚石砌成，屋頂四角各有四隻神獸盤据，門前有一雙獅子鎮守既建築物映入眼簾！ 「我地風家既祠堂，唉，已經係唯一有人住既地方黎架啦。」風山秋唏噓地道，然後轉頭敲起宅前既一扇大門，喊道：「月夏姐！你係唔係到呀？！」 過左一陣子，大門喀吱喀吱地打開了。 開門既係一個約莫廿歲既女仔黎，留住一把長髮，高高瘦瘦，樣子衣著竟然帶有幾分城市味，簡單啲講，姐係MK。嗯，估唔到係老林深山既廢村入邊都會見到MK妹。 「你是誰啊？」喔屌，講普通話既MK妹。 「唉，我個樣真係老左咁多咩？我係秋舅公呀。」 「秋舅公？秋舅公...?哦！你地入黎坐先，我去叫婆婆出黎！」喔屌，依家啲MK妹仲識兩文三語添架？ MK妹忽然彷然大悟，然後扭頭就跑左入去祠堂既入邊。 「佢係我家姐風月夏既孫女黎，好似叫風華鈴？我都唔係好記啦，都已經有好幾年無見佢囉...黎，坐底先，我家姐係風家長老中負責醫既，屍毒呢啲小事係佢眼中根本不值一提。」