【短短一個月內，屋企就死左五個人...】: 第二十二章 逃出

「中屍毒者，傷口會極速發脹，紅為輕微，青為中度，紫為嚴重，黑為必死。」 — 葬經陰卷屍章。 我馬上拉起講野變得含糊不清既張天師，開始憑住僅有既記憶，係墳場中亂跑亂闖。

但係墳場入邊實在太亂，基本上到處都係斷墳雜草，以亂葬崗黎形容都不為過。就係我揹住張天師跑到全身都係汗，六神無主既時候，無啦啦有一隻手從後扯住我件TSHIRT！ 「屌呀！」我當堂大叫左出黎，嚇出一身冷汗，全身既血立即狂泵到早已無力既雙腳，準備再發力跑！ 「係我呀少爺！阿牛呀！」一把熟悉既聲音傳出，然後我膞頭一輕，發現揹係背後既張天師比人的走左。 我轉頭一望，見到人如其名既阿牛正苦惱緊點可以一手夾起一個老人，係同時，佢已經揹住唔知係昏迷左定死左既風山秋。 「你地...呃，風老伯佢...呃...」見返突如其來出現既阿牛同風山秋，我神經瞬間鬆弛返落黎，腦筋都開始有啲唔太靈活。 伏係阿牛背上既風山秋有氣無力地抬頭，朝我虛弱地擺擺手道：「嘿，我無事，係破狐鬼個鬼掩眼個時去得太盡姐...唉，真係老啦。」 「呃...」明顯地，我係完全狀況外，根本都唔知發生緊咩事。 「出左去先啦，帶佢去風家老寨，只有個到先有人識解張老師所中既屍毒。」風山秋好快就再接上話。無錯，依家既當務之急係送左張天師去解毒先！ 阿牛一邊揹住風山秋，一邊抱住張天師，神情輕鬆自如。由風山秋既指點下，我地好快就走返出亂葬崗，赫然就見到架七人車仔泊左係門口。 唔知係咪岩岩做完劇烈運動黎，上到車竟然發現車既冷氣突然強勁左十倍咁，十分舒適。風山秋實在太過虛弱，所以司機轉左由阿牛擔任，而佢就係一旁指路。 今次我唔敢再訓啦，所以亦都藉呢個機會問清楚到底頭先發生咩事。