【短短一個月內，屋企就死左五個人...】: 第二十章 重臨怪境

張天師係不經不覺間已經行到埋黎。只見佢單手扯開車門，一下子將我拉出車外。我都未開口問到底發生咩事，張天師已經好似知道我想講咩咁，搶先一步低嘶道：「唔好問！跟住我行，狐鬼又返返黎！」 張天師既態度極度認真嚴肅，唔似係講笑，我當下都不敢再多問，只好立即閉上口，好似雞仔咁跟住佢行。落左車之後先發覺，原來奇怪既濃霧並唔係消退左，只係以張天師為中心，空出一塊大約有三至四米既範圍出黎，係呢三四米既距離外既地方依然係不可測視既白霧。張天師一路上由急行變小跑，佢不停跑，身前既濃霧就不停散開，好似有生命咁，識自動讓出一條路黎，而背後既霧就重新掩上黎，吊靴鬼咁死跟住我地。 跑左都無十分鐘，我地竟然跑左返黎風山秋哥哥所葬既墳場之中！點解我咁肯定？因為我認得出墳場入口既一尊奇怪神像，我相信呢個世界應該第二尊咁奇怪既神像架啦！！ 但係...點可能啊！？係我未訓之前，架車都開左成十幾分鐘啦，仲未計我訓左咁耐！我地有咩可能咁短時間之內跑到返黎！？我心中既驚異自然非經歷過人既所能明白，但係雖然係咁，我眼前既張天師竟然好似毫不驚訝咁，不單止無打算停落黎既跡象，反而仲一路往更深處跑！我本想叫停佢，但係身體又唔聽使，點用力叫都好，都只可以叫出一啲喀喀既怪音。無辦法之下，我唯有繼續跟住佢跑，如果萬一跟遲一步...我用力搖頭，盡力驅走腦海中恐佈既意念。 大陸既墳場無香港既咁整齊，甚至可以話係混亂。斷開一半既墳，從地面下邊露出一半既金塔，或者陰司紙鋪滿地既呢啲情況比比皆是，我強頂住墓碑相既死者空洞既眼光，跟住張天師既身影係墳場中左沖右突，接連跳過幾個墓碑，然後再繞過幾棵看似瀕死既老樹，最後終於係一個大約容兩個人訓入去既一個淺穴前停低。 土穴係空既，但係從其長度同闊度黎睇，呢個淺穴似係放人...或者死屍。 一旁既張天師喘住大氣，攰到講唔到一句完整既說話。咁又係既，要個實際年齡成七十歲既老人咁跑法，無散哂已經叫厲害。 我慢步趨近張天師，想問一下到底發生咩事，但係我突然成個人僵硬左，更連吞口水都有困難！ 我忽然見到有一隻略帶紫色既手從濃霧中伸左出黎，眼看就要搭上張天師既肩膞！