【短短一個月內，屋企就死左五個人...】: 第十九章 解救

我依家身處係邊！？其他人呢！？明明前一秒仲聽到引擎聲，做咩下一秒就唔見哂其他人，佢地去左邊呀！？我從車窗望出去，發覺出邊煙濛濛一片，能見度得幾步開外，可以話係咩都睇唔到。 我想推門出去搵佢地，但係竟然發覺身體僵硬哂，成個人坐係個位到郁都郁唔到，感覺有啲似比鬼壓。 就係我掙扎緊想走既期間既期間，車外忽然傳黎一陣陣既鎖鏈聲同埋厚重而又緩慢既腳步聲。每踏一下，都彷似有重物墜地既聲音，我敢保證，一個三百磅既肥婆都無聲音既主人咁重。更令人心驚膽跳既係，月金口尸中步聲似乎係追住我而黎！ 「吧嗒...吧嗒...吧嗒...吧嗒...吧嗒...」 七人車伴隨住有節奏既腳步聲而抖動，每踏近一步，架車既震幅就厲害一啲。但係相比之下，車入邊既我震得仲利害。係靜焗既車廂之中，此刻我既心跳聲就好似放大左十倍，係耳邊迴響不絕。 天呀，我平時又無偷窺人沖涼，最多都係抽下啲女女水姐，唔使玩到咁大下話！？老實講我死唔眼閉呀！個一刻既絕望感實在不下於爭人幾球野街數，條女再比帽自己帶，然後比老細炒魷，要賣屎忽過世既個個感覺。 就係我已經準備受死既時候，車外忽然傳黎一聲大喝！ 「太上敕令，驅邪縛魅 ，冥界天道，金光速現! 」 係張天師把聲！ 法語一出，車邊既白霧就好似退潮咁急速後退，開始取而代之既係一片無窮無盡既黑暗，同埋連綿不絕既石碑狀物體。一個中年人就係不遠處邊揮灑住一疊疊細長既白紙邊走近七人車，大量既白紙就好似雪咁從天而降，鋪到一地都係。嘩，好彩呢到係大陸，唔係一張千五罰到破產都似。

車中既我成個愣住，完全唔知唔知發生緊咩事，車外就只有張天師，而揸車既風山秋同伙記阿牛唔知去左邊。