【短短一個月內，屋企就死左五個人...】: 第十八章 迷境

狐鬼掩眼！我忽然一個激靈，醒起係爺爺留底既葬經入邊亦有過呢種咁特別既鬼掩眼既記載！正常既鬼掩眼係旨在令人係原地打轉，搵唔到路走，然後等其氣絕而死，迷惑人既鬼就可以去投胎輪迴，而來人死後會繼續係死亡地方附近打轉，直至到佢知道自己已死既呢個事實，然後再重覆以上既動作。類似農曆七月水鬼炆腳一樣，鬼掩眼都算係枉死鬼捉替身既方法之一黎！ 但係狐鬼掩眼呢，就只有湘西先有，迷惑人既鬼當然就係狐鬼。呢種鬼唔係枉死既鬼，反而係一種經過修煉既惡鬼，最中意嚇人，然後令你往其他更危險既方向逃走...例如頭先，我正正向住車來車往既高速公路退，如果頭先張天師佢地遲一步出黎，我依家可能已經...一諗到呢到，手心不然出哂汗。 「放心啦，無事架啦！相信曾長居於湘西既張師兄早已見怪不怪，對付呢啲遊魂野鬼自然手到拿來。」風山秋再次輕拍我既膞頭。 「上車走啦，仲呆係到做乜Q丫！？」遠處既張天師揮手招呼我地兩個，示意我地跟上。 我望住張天師既背影，心中疑惑開始泛現。到底張天師係咩人？佢既功力又去到邊？單憑一喝，竟然就可以喝走千百年皆不能除盡既湘西狐鬼？就算係一個有修行既道士都做唔到呢步啦下話！？ 身旁既風山秋好似可以睇穿我既心思一般，沖我一笑道：「嘿，唔好諗咁多啦。你無可能估到佢既過去。」然後就唔再理我，快步鑽入司機位之中準備開車。 一路上車都係行山路，搖搖晃晃咁好似置身係搖籃入邊。係迷迷糊糊之間，我靠住車窗訓著左。架車係中國製既七人車仔，車廂入邊冷氣不足，非常焗促，而且引擎聲極嘈，雖然係訓到，但係一路上都唔係訓得好安穩。 正當我第五次醒一醒，但係又想訓過之際，耳邊既引擎聲竟然忽然間靜哂。 我勉強地張開眼，赫然發覺車廂入邊少左啲野。身邊既阿牛，前坐位既張天師同埋司機位既風山秋竟然唔見左。 而更恐怖既係，每一隻既車窗上竟然都滿佈住一隻隻血紅色既手掌印！