【短短一個月內，屋企就死左五個人...】: 第十四章 來風客棧II

風山秋雙眼猛然睜大，呢個動作令佢泛白既左眼更顯得詭異，望到企係一邊既我起哂雞皮。佢立即請我地入客棧入邊坐低。 客棧地下個層內部面積唔算大，只可以勉強放得落兩張六人餐枱同幾張櫈，但係間客棧比我既感覺唔似得外表咁殘破，恰恰相反，我反而覺得整個格局帶有一啲古樸味。放係收銀處上一埕又一埕，以紅紙封口既酒壺，收銀處上既淡紅算盤，全木制階級，一隻隻反出冷光既銅製器皿...呢一切一切都令我同阿牛呢兩個都市人大嘆驚奇，兩個就好似鄉下仔出城咁。 張天師隨手拎左張櫈坐低，然後遞左一塊玉咁上下既野比風山秋。 「風家既當家令牌你無理由唔認得掛？」張天師施施然地講。 「認得認得...」風山秋雙手接過塊玉，珍而重之地放係手上觀摩，眼神中流露出極度既祟拜。「我爺爺同我講過你地既事跡，仲吩咐我地遇到人拎住呢塊昆侖玉黎，就一定要報恩，即使要犧牲哂我地家族上下既成員們...」 我企係一邊一路聽，一路覺得隱隱約約有啲唔對路，但係又講唔出邊到唔妥。甚至連一旁既阿牛都覺得有啲奇怪，輕輕扯一扯我件衫，偷偷地細細聲問我：「大少呀，姐係佢地既關係係點呀？我覺得...呃...好似有啲唔知點咁既。」我攤一攤手，對佢苦笑左一下，心中暗道：我都諗唔通呀牛哥！ 「嗯，認得就得。我唔要求風家還返一個對等既人情比我，我只係想同你打聽一啲野。」張天師撥一撥手，打斷左風山秋既說話，然後劈頭就切入重點。只見佢從上衣既內口袋中拎出張白紙，小心翼翼地攤開佢，赫然發現原來張白紙就係神秘老伯帶比我既委託！ 張天師指住紙上既一個姓名問：「呢個姓風既係咩人黎？依我所知，成個湘西得你地來風客棧既人係姓風，唔好同我講你唔知佢係邊個。」 風山秋接過委託紙，然後一下子面色劇變。「呢個....呃...呃...呢個...我怕我講左你地都唔信...呃...」

「屌快啲講啦，好多時間咩你估我！？」 「呢個...呢個風海冬係我已經死左二十年既親生細佬！」