【短短一個月內，屋企就死左五個人...】: 第十五章 墳場

張天師臉色一變，屁股一抽，從櫈上企起身，開始係屋中來回踱步。 「等陣先，比人冒認唔得架咩？風老伯，你都識講啦，你細佬都已經死左二十年啦，鬼仲認得佢個樣咩！求其搵個人冒認...」我舉手，提出我既疑點。 「唔可能！你阿爺同你一班阿叔個個都經歷過大風大浪，如果唔係拎到一啲好有力既證明出黎，佢地係絕對唔會簽呢張委託！」張天師不耐煩地擺擺手，打斷我既問題。 「咁...咁會唔係會個啲簽名係冒簽既？」一旁既阿牛鼓足勇氣，提出自己既問題。 「唔會！唉，虧你仲話係鋪頭既伙計，你唔見平時爺爺或者阿叔佢地係用印章黎簽啲單架咩？我都只係見過幾次咋，邊個可以冒簽到！？」我搖搖頭，直接否定左佢既問題。 「嗯，同埋寧林森既簽名好特別，一般人模仿唔到。」張天師點點頭，依然繼續踱步。 突然間，張天師打左個響指，腳步亦隨之而停低。 「你細佬葬左係邊，你帶我去睇下。」 湘西話大唔大，話細話細，由湘西既市區去出到去湘西既郊區，竟然就用左成三個幾鐘。當我地趕到去風海冬落葬既地點個時，天都早就已經黑哂。風秋山坦言自己都已經有好多年無黎過拜自己細佬，所以個墳場咁大，佢都無辦法一時三刻就搵到個墓，要勞煩我地跟佢行一轉。 夜晚既墳場就好似有幾百對眼望住你咁，每個墓上既相中人都會死命地?住你，你每踏前一步佢就望住你行一步咁。呢種既感覺實在係好難頂。所以我耍手擰頭死都唔入去，寧願自己一個係墳場口有光既地方坐等佢地。 張天師亦都無難為我，點點頭算係由我咁做。而一心黎撞鬼既阿牛當然係死都要跟埋入去啦！ 張天師一行人入左去墳場之後，我搵左棵月光照到既樹，係樹底下百無聊賴地坐底左。我放低背包，望住天上既月光，忽然醒起自己晚餐都未食，開始覺得有啲餓。突然腦中一閃，醒起頭先係市集買左啲乾臘肉同自家制既農村米酒未有時間食，依家正好可以拎黎醫下肚。以前爺爺就曾經買過呢種湘西既特產乾臘肉比我地食，唉，真係估唔到，竟然要等我爺爺死左，先有機會可以再回味返個種咁特別既味道。 我將壺酒放係身後，然後馬上掉一片臘肉入口咀嚼。 嗯！好味！味道同以前食過既差唔多！以前爺爺佢地仲會一啖酒一啖肉，聽講話咁樣仲正好味，由細個開始已經一路都好想試，但係佢地一人一句細路仔唔準飲酒就打發左我走，不過...哈哈！我依家終於可以飲啦！我轉身，打算拎返頭先放左係身後邊既個壺酒。 但係我身後咩都無。我放係身後既酒竟然憑空就咁唔見左。