【短短一個月內，屋企就死左五個人...】: 第十三章 來風客棧

張天師突然大手一揮，阻止我地入去。正當我奇怪緊既時候，張天師忽然扯大喉嚨大喊：「日光月照，天陰地暗。」 「星空睛明，穿山越嶺。」不消幾秒，看似早已人去樓空既屋內竟然有一把蒼老但雄渾既聲音回道，仲要係以廣東話回！ 「寧謐靜鄉，波起雲湧。」張天師再回話。嗯，憑我睇左咁多年武俠小說既知識話我知佢地係用緊暗語黎對話，不過令我大吃一驚既係，一個咁現代既城市竟然仲存在住一啲咁上世紀既野。 「風起風落，來者不拒，來風客棧風山秋。」 「寧家張天道，無客人隨行。」哦，原來張天師全名係叫張天道，又會有人叫天道咁霸道既。 「嗯？到底來者係湘西趕屍寧家？定係湘西道師張家？無客人到訪來風客棧又有何貴幹？」 「唉屌，依家啲人真係麻撚煩，係咁問問問。」張天師點起枝萬寶路，轉頭望向我地，又指一指殘舊既木門。「屌你啦唔好講廢話，唔係睇住風維新既面子我一早爆門入撚左黎啦，仲同你哂口水係到嗲咩！快啲同老子開門！」 木門並無好似預期咁打開，反而木門後邊既人竟然大吃一驚，語氣顫抖道：「你...你...你地竟然識我爺爺？」 張天師眉頭一抬，語氣不屑：「哼，點會唔識？當年風維新曾經有求於我同寧家，唔係我同寧家聯手，單憑你地風家同辰州陳家點可能擺平當年滅盡湘西道家三大門既個隻旱魃王？！」 果然，張天師語音剛落，木門隨即應聲而開。 開門既竟然同樣係一名白髮蒼蒼既老者，身型高大，竟然同一米七幾既我平頭，面上瘡疤纍纍，一隻眼珠泛白，都唔知佢仲睇唔睇到野。 睇黎佢就係呢間來風客棧既主人，風山秋。