【短短一個月內，屋企就死左五個人...】: 第八章 葬經

張天師手震震咁拎起本書，口中一直喃喃自語，好似鬼上身咁樣。佢一直保持住呢個樣好耐，但係都唔同我呢個局外人講下到底呢本書到底係咩一回事。
 
我心急起上黎，用力搖左佢幾下，試圖將佢拉返黎現實。「張叔呀，你講清楚啲姐係點先啦! 」
 
張天師回過神來，隨即擺一擺手，虛弱地道:「呢本野，就係呢本野…呢本野叫做葬經，係東晉年間，由一代風水奇人郭璞所著，得者可以話盡得風水真傳…但係…」張天師勉強吞左啖口水，搖搖擺擺地坐低左。
 
「但係一直無人知道，原來葬經係分左陰陽兩冊，陽冊記載既通通都係風水之說，陰冊，亦姐係你阿爺所得既呢本就記錄左大量妖魔鬼怪既事…野史記載曾經有過兩人擁有呢本扎記，一個係曹操，另一個係慈禧太后，佢地都因為想發掘書中既野而變得性情大變，
 
輕則好似曹操咁就只係痴Q左線，成立左摸金校尉，無點勞民傷財，重則好似慈禧咁…打算起圓明園以召喚鬼王上人間，搞到最後國破人亡…
 




陰陽間本就互相制衡，按道家既理論，書上早已附有前幾代擁有者既怨念係到，本書本身就已經係極陰之物，連我呢種有一定修為既都唔敢接觸…唯一可以壓制到既當然就係陽冊。」
 
張天師對我苦笑左一下:「但係何必留住一本咁危險既野係身邊，然後再去搵陽冊呢本可能一早已經唔存在係呢個世界上既野呢?寧林森，當年我既勸告你竟然唔聽，你真係老到懵撚左啊!」