【短短一個月內，屋企就死左五個人...】: 第七章 往事II

就係咁，爺爺同張家就結下左不解之緣。雖然爺爺身份係一名於黑暗中穿梭既趕屍匠，但係唔代表佢係大奸大惡之人，佢都有一顆慈悲既心。佢見張家既人咁慘，竟然丟低兩脈間既仇恨，主動提出接濟身無分文既張家一行人返去自己既村入邊住。不過當然啦，道教同趕屍一脈關係冰封千日，非一時所能溶化，所以肯黎既人真係少之又少，但係張天師係其中之一。無他既，張天師係修道前讀過下書，自然份人就比起只係修法既老一輩開通，所以咪肯黎囉。
 
慢慢地，張天師通過閱讀寧家村入邊既不同藏書同埋用佢地收集返黎既屍體去練習，逐漸練出一身高強既道法。而為左報恩，佢亦主動幫寧家既人調配不同既辰砂，畫不同法力更強既符，協助寧家趕屍更快更方便，令寧家一脈既威名更盛，所以話，一個城市唔能夠只有邪，同時亦唔能夠只有正，無邪又點顯得有正?
 
呢段關係一直KEEP左成十年，直到去到一九七幾年個時，因為科技發逹起黎，係大陸需要趕屍既人愈黎愈少，爺爺佢地漸漸唔可以再靠趕屍為生，輾轉之下決定落黎香港，靠住自己既經驗知識，轉戰其他既相關行業。
 
「你阿爺做過道士，堂倌，棺材鋪老細，直到十年前，你阿爺先叫正式退休。但係與此同時，麻煩就黎啦!丫係，你有無見過一本扎記?應該係藍色封…」
 
「梗係有啦! 」一聽到張天師提起本野，我就即刻搶先答道，又用手指一指放埋左一邊既個本…扎記。本野唔通真係有咩特別?
 




張天師沿住我手指既方法望去，成個人都即刻呆左。
 
「哈，你阿爺真係仲有留住佢，我十年前叫佢掉左去佢唔聽…好啦，家陣害死哂寧家既人啦! 」